ஹோமாகம பொலிஸ் நிலையத்தின் தடுப்புக் காவலில் வைக்கப்பட்டிருந்த நபர் ஒருவர் உயிரிழந்த சம்பவம் தொடர்பாக, பொலிஸ் நிலையப் பொறுப்பதிகாரி (OIC) உள்ளிட்ட மூன்று பொலிஸ் அதிகாரிகளை இலங்கை மனித உரிமைகள் ஆணைக்குழுவில் ஆஜராகுமாறு அறிவிக்கப்பட்டுள்ளது.
இதன்படி, நாளை (29) ஆணைக்குழுவில் ஆஜராகி வாக்குமூலம் வழங்குமாறு குறித்த அதிகாரிகளுக்கு அழைப்பு விடுக்கப்பட்டுள்ளதாக, ஆணைக்குழுவின் ஆணையாளரும் சிரேஷ்ட சட்டத்தரணியுமான நிமல் ஜி. புஞ்சிஹேவா தெரிவித்துள்ளார்.
இந்த உயிரிழப்புச் சம்பவம் தொடர்பில் மனித உரிமைகள் ஆணைக்குழு முன்னெடுத்து வரும் விசாரணைகளின் ஒரு பகுதியாக, உயிரிழந்த நபரின் குடும்ப உறுப்பினர்கள் சிலரிடமும் ஏற்கனவே வாக்குமூலங்கள் பதிவு செய்யப்பட்டுள்ளன.
இதேவேளை, மேல் மாகாண தெற்கு வலய குற்றப் புலனாய்வுப் பிரிவினரும் சம்பவம் தொடர்பில் விசாரணைகளை முன்னெடுத்து வருகின்றனர். இதற்கமைய, குறித்த நபரைக் கைது செய்த சந்தர்ப்பத்தில் கடமையில் இருந்த நான்கு பொலிஸ் அதிகாரிகளிடம் வாக்குமூலங்கள் பெறப்பட்டுள்ளன.
இந்தச் சம்பவம் தொடர்பில் ஹோமாகம பொலிஸ் நிலையத்தின் குற்றத்தடுப்புப் பிரிவின் பொறுப்பதிகாரி, ஊழல் தடுப்புப் பிரிவின் பொறுப்பதிகாரி மற்றும் பொலிஸ் கான்ஸ்டபிள் ஒருவர் ஆகியோர் ஏற்கனவே பணியிலிருந்து இடைநிறுத்தப்பட்டுள்ளனர்.
இவர்களைத் தவிர, சம்பவம் இடம்பெற்ற தினத்தில் கடமையில் இருந்த மேலும் நான்கு பொலிஸ் அதிகாரிகளிடமும் விசாரணைகளின் அடிப்படையில் வாக்குமூலங்கள் பதிவு செய்யப்பட்டுள்ளன.
மேலும், உயிரிழந்த நபரின் சகோதரியிடமும் மேல் மாகாண தெற்கு வலய குற்றப் புலனாய்வுப் பிரிவினர் வாக்குமூலம் பெற்றுள்ளனர்.
உயிரிழந்த நபருடன் இணைந்து கைது செய்யப்பட்டு தற்போது விளக்கமறியலில் வைக்கப்பட்டுள்ள மற்றுமொரு சந்தேகநபரிடமும் வாக்குமூலம் பெறுவதற்காக நீதிமன்ற உத்தரவைப் பெற்றுக்கொள்ள நடவடிக்கை எடுக்கப்பட்டு வருவதாகப் பொலிஸார் தெரிவித்துள்ளனர்.
தடுப்புக் காவலில் இடம்பெற்ற இந்த உயிரிழப்பு தொடர்பில் மனித உரிமைகள் ஆணைக்குழுவும் குற்றப் புலனாய்வுப் பிரிவினரும் விசாரணைகளை முன்னெடுத்து வரும் நிலையில், நாளை நடைபெறவுள்ள விசாரணைகள் முக்கியத்துவம் பெற்றுள்ளன.
