திருகோணமலை – மட்டக்களப்பு பிரதான வீதியின் பூநகர் பகுதியில் கார் ஒன்றும் மோட்டார் சைக்கிளும் மோதி விபத்துக்குள்ளானதில் இரு இளைஞர்கள் காயமடைந்துள்ளதுடன், அவர்களில் ஒருவர் கவலைக்கிடமான நிலையில் வைத்தியசாலையில் சிகிச்சை பெற்று வருகின்றார்.
குறித்த விபத்து நேற்று (27) செவ்வாய்க்கிழமை இரவு ஈச்சிலம்பற்று பொலிஸ் பிரிவுக்குட்பட்ட பூநகர் பகுதியில் இடம்பெற்றுள்ளது.
விபத்தில் மோட்டார் சைக்கிளில் பயணித்த 17 மற்றும் 18 வயதுடைய இரு இளைஞர்களும் காயமடைந்துள்ளனர்.
இதில், ஈச்சிலம்பற்று – பூநகர் பகுதியைச் சேர்ந்த 17 வயதுடைய இளைஞர் படுகாயமடைந்த நிலையில் முதலில் மூதூர் வைத்தியசாலையில் அனுமதிக்கப்பட்டு, பின்னர் மேலதிக சிகிச்சைகளுக்காக மட்டக்களப்பு போதனா வைத்தியசாலைக்கு மாற்றப்பட்டுள்ளார். அவரது நிலை கவலைக்கிடமாக உள்ளதாகத் தெரிவிக்கப்படுகிறது.
அதேவேளை, தோப்பூர் – பள்ளிக்குடியிருப்பு பகுதியைச் சேர்ந்த 18 வயதுடைய மற்றைய இளைஞர் மூதூர் தள வைத்தியசாலையில் அனுமதிக்கப்பட்டு சிகிச்சை பெற்று வருகின்றார்.
விபத்துக்குள்ளான கார் மற்றும் மோட்டார் சைக்கிள் ஆகியன பொலிஸ் நிலையத்திற்குக் கொண்டு செல்லப்பட்டுள்ளன.
விபத்துக்கான காரணம் தொடர்பில் ஈச்சிலம்பற்று பொலிஸார் மேலதிக விசாரணைகளை முன்னெடுத்து வருகின்றனர்.
