ஈரான் மீது கடுமையான தாக்குதலை நடத்தப்போவதாக அமெரிக்க ஜனாதிபதி டொனால்ட் ட்ரம்ப் எச்சரிக்கை விடுத்திருந்த நிலையில், ஈரானுடன் அமைதிப் பேச்சுவார்த்தைகளை முன்னெடுப்பதற்கான முயற்சிகள் இடம்பெற்று வருவதாகத் தகவல்கள் வெளியாகியுள்ளன.
ஈரானின் பாதுகாப்பு அதிகாரியைத் தொடர்புகொள்ள அமெரிக்க துணை ஜனாதிபதி ஜே.டி. வான்ஸ் மேற்கொண்ட முயற்சிகள், ஈரானுடனான மற்றொரு போரைத் தவிர்ப்பதற்கு அமெரிக்க நிர்வாகம் விரும்புகிறதா என்ற கேள்வியை எழுப்பியுள்ளதாக அரசியல் ஆய்வாளர் இஹ்சான் அல்-கதீப் தெரிவித்துள்ளார்.
ஈரானின் ஆட்சியில் தீர்மானங்களை எடுக்கும் முக்கிய அதிகார மையங்களுடன் நேரடியாகத் தொடர்புகொள்வதற்கு ட்ரம்ப் நிர்வாகம் முயற்சிப்பதை இந்த நடவடிக்கை வெளிப்படுத்துவதாகவும் அவர் குறிப்பிட்டுள்ளார்.
முன்னதாக, ஈரானின் உயர் தேசிய பாதுகாப்பு கவுன்சிலின் செயலாளர் மொஹ்சென் ரெசாயியைத் தொடர்புகொள்ள வான்ஸுக்கு அனுமதி வழங்கியதாக ட்ரம்ப் தெரிவித்திருந்தார். மருத்துவப் பொருட்கள் தொடர்பான தேவைகளைக் கருத்தில் கொண்டு இந்தத் தொடர்பு ஏற்படுத்தப்பட்டதாகவும் குறிப்பிடப்பட்டது.
இதற்கிடையில், அமெரிக்க ஊடகங்கள் வெளியிட்டுள்ள தகவல்களின்படி, அமைதிப் பேச்சுவார்த்தைகளை முன்னெடுக்குமாறு வலியுறுத்தி வான்ஸ் கடிதமொன்றை அனுப்பியுள்ளதாகத் தெரிவிக்கப்படுகிறது.
மறுபுறம், ஹோர்முஸ் நீரிணை வழியாகச் செல்லும் இணையக் கேபிள்களைத் துண்டிப்பதால் ஏற்படக்கூடிய விளைவுகளைச் சித்தரிக்கும் காணொளியொன்றை ஈரான் வெளியிட்டதாகவும் தகவல்கள் தெரிவிக்கின்றன. இத்தகைய நடவடிக்கை உலகளாவிய இணையத் தொடர்புகளில் கடுமையான பாதிப்புகளை ஏற்படுத்தக்கூடும் என அந்தக் காணொளியில் சித்தரிக்கப்பட்டுள்ளதாகக் கூறப்படுகிறது.
எனினும், அமெரிக்கா–ஈரான் இடையிலான தொடர்பு முயற்சிகள் போரைத் தவிர்ப்பதற்கான உறுதியான உடன்பாட்டிற்கு வழிவகுக்குமா என்பது தொடர்பில் இதுவரை தெளிவான தகவல்கள் வெளியாகவில்லை.
