வங்காள விரிகுடாவின் ஆழ்கடல் பகுதிகளில் பலத்த காற்று வீசுவதுடன் கடல் மிகவும் கொந்தளிப்பாகக் காணப்படக்கூடும் என்பதால், நெடுநாள் மீன்பிடிப் படகுகளுக்கு வளிமண்டலவியல் திணைக்களம் எச்சரிக்கை விடுத்துள்ளது.
இன்று (03) முற்பகல் 10.30 மணிக்கு வெளியிடப்பட்ட இந்த எச்சரிக்கை அறிவித்தல் அடுத்த 24 மணித்தியாலங்களுக்கு அமுலில் இருக்கும் எனத் தெரிவிக்கப்பட்டுள்ளது.
‘முரசு’ புயல் தற்போது இந்திய நிலப்பரப்புக்குள் நுழைந்துள்ளதுடன், அது தொடர்ந்து வடக்கு நோக்கி நகர்ந்து பின்னர் வடமேற்குத் திசையில் பயணிக்கும் என எதிர்பார்க்கப்படுகிறது.
வளிமண்டலவியல் திணைக்களத்தின் எதிர்வுகூறலின்படி, இன்று முற்பகல் 11.30 மணியளவில் சாதாரண புயலாகவும், இரவு 11.30 மணியளவில் ஆழ்ந்த காற்றழுத்தத் தாழ்வு மண்டலமாகவும் படிப்படியாக வலுவிழக்கும் எனக் குறிப்பிடப்பட்டுள்ளது.
எனினும், எச்சரிக்கை விடுக்கப்பட்டுள்ள கடற்பரப்புகளில் காற்றின் வேகம் அவ்வப்போது மணிக்கு 65 முதல் 75 கிலோமீற்றர் வரை அதிகரிக்கக்கூடும்.
அத்துடன், இடியுடன் கூடிய பலத்த மழையும் பெய்யக்கூடும் என்பதால் குறித்த கடற்பகுதிகள் மிகவும் கொந்தளிப்பான நிலையில் காணப்படும் என எச்சரிக்கப்பட்டுள்ளது.
இதனால் ஆழ்கடலில் பயணிக்கும் மீன்பிடிப் படகுகளின் உரிமையாளர்கள், மீனவர்கள் மற்றும் கடற்சார் சமூகத்தினர் மிகுந்த அவதானத்துடன் செயற்படுமாறு வளிமண்டலவியல் திணைக்களம் அறிவுறுத்தியுள்ளது.
மேலும், ‘முரசு’ புயல் தொடர்பாக வெளியிடப்பட்ட இறுதி எச்சரிக்கை அறிவித்தல் இதுவெனவும் திணைக்களம் குறிப்பிட்டுள்ளது.
