அணுவாயுதத் தாக்குதல் ஒன்று இடம்பெற்றால் உயிரைப் பாதுகாத்துக்கொள்வதற்காக பொதுமக்கள் எவ்வாறான நடவடிக்கைகளை மேற்கொள்ள வேண்டும் என்பது தொடர்பில் ஈரான் அவசரகால வழிகாட்டுதல்களை வெளியிட்டுள்ளது.
இதற்காக சுமார் எட்டு நிமிடங்கள் கொண்ட விழிப்புணர்வுக் காணொளியையும் ஈரானின் அரச செய்தி நிறுவனமான IRNA வெளியிட்டுள்ளது.
அதில், அணு வெடிப்பின்போது ஏற்படும் பிரகாசமான ஒளியை நேரடியாகப் பார்க்க வேண்டாம் என்றும், வெடிப்பின் அதிர்வலைகள் கடந்த பின்னர் அருகிலுள்ள உறுதியான கட்டடத்திற்குள் தஞ்சமடையுமாறும் அறிவுறுத்தப்பட்டுள்ளது.
குறிப்பாக, கட்டடங்களின் அடித்தளங்கள் அல்லது ஜன்னல்கள் இல்லாத உட்புறப் பகுதிகளில் தங்குவதுடன், கதவுகள் மற்றும் ஜன்னல்களை மூடி, வெளிக்காற்றை உள்ளிழுக்கும் காற்றோட்ட அமைப்புகளை நிறுத்துமாறும் தெரிவிக்கப்பட்டுள்ளது.
மேலும், கதிரியக்கத் தூசு உடலில் படிந்திருக்கலாம் எனச் சந்தேகிக்கப்பட்டால் வெளிப்புற ஆடைகளை அகற்றி உடலைச் சுத்தம் செய்யுமாறும், குறைந்தது 24 மணிநேரம் பாதுகாப்பான இடத்தை விட்டு வெளியேற வேண்டாம் என்றும் வழிகாட்டப்பட்டுள்ளது.
ஈரானின் சிவில் பாதுகாப்பு விழிப்புணர்வு நடவடிக்கையின் ஒரு பகுதியாக இந்த அறிவுறுத்தல்கள் வெளியிடப்பட்டுள்ளன. எனினும், அணுவாயுதத் தாக்குதல் ஒன்று உடனடியாக இடம்பெறவுள்ளதாக வெளியிடப்பட்ட எச்சரிக்கை இதுவல்ல.
