அம்பாறை, கல்முனைக்குடி பகுதியில் முன்னெடுக்கப்பட்ட விசேட சோதனை நடவடிக்கையின்போது, சட்டவிரோதமாக விற்பனை செய்வதற்காகப் பதுக்கி வைக்கப்பட்டிருந்த 6 கிலோகிராமுக்கும் அதிகமான போதைப்பொருட்களுடன் 61 வயதுடைய சந்தேகநபர் ஒருவர் கைது செய்யப்பட்டுள்ளார்.
இலங்கை கடற்படையினரும் கல்முனை மதுவரித் திணைக்கள அதிகாரிகளும் இணைந்து நேற்று (03) இந்த விசேட சோதனை நடவடிக்கையை முன்னெடுத்துள்ளனர்.
தென்கிழக்கு கடற்படை கட்டளையின் கீழ் செயற்படும் கடற்படையினருக்குக் கிடைத்த இரகசியத் தகவலின் அடிப்படையில் இந்த நடவடிக்கை மேற்கொள்ளப்பட்டுள்ளது.
இதன்போது, கல்முனைக்குடி பகுதியில் சந்தேகத்திற்கிடமான முறையில் நடமாடிய நபர் ஒருவரை அதிகாரிகள் சோதனையிட்டுள்ளனர்.
இதன்போது, சட்டவிரோத விற்பனைக்காக 94 சிறிய பொதிகளாகப் பொதி செய்யப்பட்டிருந்த 6 கிலோகிராமுக்கும் அதிகமான போதைப்பொருட்கள் கைப்பற்றப்பட்டுள்ளன.
இதனையடுத்து, கல்முனைக்குடி பகுதியைச் சேர்ந்த 61 வயதுடைய நபர் கைது செய்யப்பட்டுள்ளார்.
கைது செய்யப்பட்ட சந்தேகநபரையும் கைப்பற்றப்பட்ட போதைப்பொருட்களையும் மேலதிக சட்ட நடவடிக்கைகளுக்காக கல்முனை மதுவரித் திணைக்கள அலுவலகத்தில் கடற்படையினர் ஒப்படைத்துள்ளனர்.
சம்பவம் தொடர்பான மேலதிக விசாரணைகள் முன்னெடுக்கப்பட்டு வருகின்றன.
