1973ஆம் ஆண்டு எம்.ஜி.ஆர் நடிப்பில் வெளியாகி பெரும் வரவேற்பைப் பெற்ற ‘உலகம் சுற்றும் வாலிபன்’ திரைப்படத்தில் நடித்த தாய்லாந்து நாட்டைச் சேர்ந்த பழம்பெரும் நடிகை மேட்டா ரூங்ராத் (Metta Roongrat) துப்பாக்கியால் சுட்டுத் தற்கொலை செய்துகொண்டுள்ளதாகத் தெரிவிக்கப்பட்டுள்ளது.
83 வயதான நடிகை மேட்டா ரூங்ராத், தாய்லாந்தின் மின்புரி நகரில் உள்ள தனது வீட்டின் படுக்கையறையில் கடந்த செவ்வாய்க்கிழமை (நவம்பர் 3) துப்பாக்கிச் சூட்டுக் காயங்களுடன் சடலமாக மீட்கப்பட்டுள்ளார்.
‘உலகம் சுற்றும் வாலிபன்’ திரைப்படத்தில் எம்.ஜி.ஆர் உடன் மஞ்சுளா, லதா, சந்திரகலா உள்ளிட்டோருடன் இணைந்து நடித்திருந்த இவர், குறிப்பாகப் படத்தில் இடம்பெற்ற ‘பச்சைக்கிளி முத்துச்சரம்’ பாடலில் எம்.ஜி.ஆருடன் இணைந்து நடனமாடியதன் மூலம் தமிழ் ரசிகர்களிடையே பிரபலமானார்.
நடிகை அல்சைமர் எனப்படும் மறதி நோயால் பாதிக்கப்பட்டிருந்ததாகத் தாய்லாந்து அதிகாரிகள் தெரிவித்துள்ளனர். மேலும், அவர் உயிரிழந்த அறைக்குள் வெளிநபர்கள் எவரும் பிரவேசித்ததற்கான அறிகுறிகள் கண்டறியப்படவில்லை என்றும் தெரிவிக்கப்பட்டுள்ளது.
சம்பவம் தொடர்பில் தகவலறிந்த அதிகாரிகள் அவரது உடலை மீட்டு மேலதிக விசாரணைகளை முன்னெடுத்து வருகின்றனர்.
தாய்லாந்தின் முன்னணி நடிகைகளில் ஒருவராகத் திகழ்ந்த மேட்டா ரூங்ராத்தின் மரணம் தமிழ் இரசிகர்கள் மற்றும் திரையுலகினர் மத்தியில் சோகத்தை ஏற்படுத்தியுள்ளது.
