தீபாவளிப் பண்டிகையை வரவேற்கும் வகையில் மட்டக்களப்பு நகரை அழகுபடுத்தி ஒளியூட்டும் விசேட வேலைத்திட்டங்கள் முன்னெடுக்கப்பட்டுள்ளன.
இதன் ஒரு பகுதியாக, மட்டக்களப்பின் புகழ்பெற்ற கல்லடி புதிய பாலத்தில் அமைக்கப்பட்ட கண்கவர் அலங்கார மின் வளைவுகள் ஒளியூட்டி திறந்து வைக்கும் நிகழ்வு நேற்று மாலை (05) நடைபெற்றது.
மட்டக்களப்பு மாநகரசபை முதல்வர் சிவம்பாக்கியநாதன் தலைமையில் நடைபெற்ற இந்நிகழ்வில், தமிழ்நாடு சென்னை மாவட்ட முன்னாள் ஆளுநர் என்.எஸ். சரவணன் பிரதம அதிதியாகக் கலந்துகொண்டு அலங்கார மின் வளைவுகளை உத்தியோகபூர்வமாகத் திறந்து வைத்தார்.
இந்துக்களின் முக்கிய பண்டிகைகளில் ஒன்றான தீபாவளியை முன்னிட்டு, மட்டக்களப்பு மாநகரசபையினால் முன்னெடுக்கப்பட்டுள்ள இத்திட்டம் நகரின் அழகை மேலும் மெருகூட்டும் வகையில் அமைந்துள்ளது.
இந்நிகழ்வில் மட்டக்களப்பு மாவட்ட நாடாளுமன்ற உறுப்பினர் வைத்தியர் இ. சிறிநாத், மாநகரசபையின் பிரதி முதல்வர் வை. தினேஸ்குமார், ஆணையாளர் தனஞ்செயன், மாநகரசபை உறுப்பினர்கள் உள்ளிட்ட பல முக்கிய பிரமுகர்களும் கலந்துகொண்டனர்.
அத்துடன், ரோட்டரிக் கழகத்தின் தன்வந்திரி செயற்திட்ட பிரதானி டி.ஆர். தனசேகர், சிறப்பு முன்னெடுப்புக்களுக்கான பிரதானி எஸ். சாய்சேக்ஷன் மற்றும் ரோட்டரி வலயம் 5 தெற்காசிய உறுப்பினர் ஒருங்கிணைப்பாளர் ஜெகவண்ணன் உள்ளிட்டோரும் பங்கேற்றனர்.
இதன்போது கல்லடி புதிய பாலத்தில் அமைக்கப்பட்டிருந்த அலங்கார மின் வளைவுகள் ஒளியூட்டப்பட்டதைத் தொடர்ந்து, வண்ணமயமான ஒளி அலங்காரத்தில் பாலம் ஜொலித்தது.
இந்த அழகிய காட்சியைக் காண்பதற்காகப் பெருமளவான பொதுமக்கள் ஒன்றுகூடியிருந்தமை குறிப்பிடத்தக்கது.
