சுமார் 23 கோடி ரூபாவுக்கும் அதிக பெறுமதியான குஷ் மற்றும் ஹஷீஷ் போதைப்பொருட்களை நாட்டிற்குள் கடத்தி வந்த இந்தியப் பிரஜை ஒருவர் இன்று (07) அதிகாலை கட்டுநாயக்க பண்டாரநாயக்க சர்வதேச விமான நிலையத்தில் கைது செய்யப்பட்டுள்ளார்.
விமான நிலையத்திலிருந்து போதைப்பொருட்களை வெளியே கொண்டு செல்ல முற்பட்ட சந்தர்ப்பத்தில், விமான நிலைய பொலிஸ் போதைப்பொருள் ஒழிப்புப் பிரிவினரால் மேற்கொள்ளப்பட்ட சுற்றிவளைப்பில் சந்தேகநபர் கைது செய்யப்பட்டுள்ளார்.
கைது செய்யப்பட்டவர் இந்தியாவின் தமிழ்நாட்டைச் சேர்ந்த 37 வயதுடைய வர்த்தகர் என ஆரம்பகட்ட விசாரணைகளில் தெரியவந்துள்ளது.
சந்தேகநபர் இன்று அதிகாலை சுமார் 12 மணியளவில் மலேசியாவின் கோலாலம்பூரிலிருந்து வந்த விமானம் மூலம் கட்டுநாயக்க விமான நிலையத்தை வந்தடைந்துள்ளார்.
அவர் கொண்டு வந்த பயணப் பையைச் சோதனையிட்டபோது, புளித்தொப்பிகள் அடங்கியுள்ளதாகக் குறிப்பிடப்பட்டிருந்த நான்கு தகரப் பெட்டிகளுக்குள் சூட்சுமமாக மறைத்து வைக்கப்பட்டிருந்த 2 கிலோ 102 கிராம் குஷ் போதைப்பொருள் கண்டுபிடிக்கப்பட்டுள்ளது.
மேலும், ஆறு டொபி பொதிகளிலிருந்து 5 கிலோ 260 கிராம் ஹஷீஷ் போதைப்பொருளும் பொலிஸாரால் கைப்பற்றப்பட்டுள்ளது.
கைது செய்யப்பட்ட சந்தேகநபரையும் கைப்பற்றப்பட்ட போதைப்பொருட்களையும் இன்று நீர்கொழும்பு நீதவான் நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளது.
சம்பவம் தொடர்பில் மேலதிக விசாரணைகளை முன்னெடுப்பதற்காக சந்தேகநபரைத் தடுப்புக்காவலில் வைத்து விசாரிப்பதற்கான உத்தரவைப் பெற பொலிஸ் போதைப்பொருள் ஒழிப்புப் பிரிவினர் நடவடிக்கை எடுத்து வருகின்றனர்.
