செயற்கை நுண்ணறிவு (AI) தொழில்நுட்பத்தின் வளர்ச்சியால் ஏழை மற்றும் பணக்காரர்களுக்கு இடையிலான பொருளாதார இடைவெளி வேகமாக அதிகரித்து வருவதாகத் தெரிவித்துள்ள மைக்ரோசொப்ட் நிறுவனத்தின் இணை நிறுவனர் பில்கேட்ஸ், உலகக் கோடீஸ்வரர்களுக்கும் மனிதர்களுக்குப் பதிலாகப் பணியமர்த்தப்படும் ரோபோக்களுக்கும் அதிக வரி விதிக்கப்பட வேண்டும் என வலியுறுத்தியுள்ளார்.
செயற்கை நுண்ணறிவின் அபரிமிதமான வளர்ச்சி பெரும் செல்வத்தை உருவாக்கி வருகின்ற போதிலும், அதன் நன்மைகள் ஏற்கனவே பெரும் செல்வந்தர்களாகவும், வலுவான நிறுவனங்களாகவும் இருப்பவர்களிடமே அதிகளவில் சென்றடைவதாக அவர் சுட்டிக்காட்டியுள்ளார்.
இதனால் சமூகத்தில் பொருளாதார ஏற்றத்தாழ்வுகள் மேலும் அதிகரிக்கும் அபாயம் காணப்படுவதாகவும், செல்வந்தர்கள் வழங்கும் நன்கொடைகள் மற்றும் அறக்கட்டளை உதவிகள் மாத்திரம் இந்த இடைவெளியைக் குறைக்கப் போதுமானதாக இருக்காது என்றும் அவர் தெரிவித்துள்ளார்.
எனவே, அரசாங்கங்கள் தமது வரி விதிப்பு முறைகளில் மாற்றங்களை ஏற்படுத்தி, பெரும் செல்வந்தர்களுக்கு அதிக வரி விதிக்க வேண்டும் எனவும் அவர் வலியுறுத்தியுள்ளார்.
அதேவேளை, மனிதத் தொழிலாளர்களுக்குப் பதிலாகப் பயன்படுத்தப்படும் இயந்திரங்கள் மற்றும் ரோபோக்களுக்கும் வரி விதிக்கப்பட வேண்டும் என அவர் குறிப்பிட்டுள்ளார்.
மனிதர்களை வேலைக்கு அமர்த்தும் நிறுவனங்கள் அதற்கான வரிகளைச் செலுத்தும் நிலையில், ரோபோக்களைப் பணியில் ஈடுபடுத்தும்போது அவற்றுக்கான செலவுகளைத் தொழில் செலவுகளாகக் கணக்கிடுவதால் வரிச் சலுகைகள் கிடைப்பதாகவும் அவர் சுட்டிக்காட்டியுள்ளார்.
ரோபோக்களுக்கு வரி விதிப்பதன் மூலம் மனிதர்களின் வேலைவாய்ப்புகள் பறிபோவதை ஓரளவுக்குக் கட்டுப்படுத்துவதுடன், தொழிலாளர்களுக்கு மறுபயிற்சி வழங்குவதற்கான நிதியையும் திரட்ட முடியும் என பில்கேட்ஸ் தெரிவித்துள்ளார்.
எனினும், என்விடியா நிறுவனத்தின் தலைவரான ஜென்சன் ஹுவாங் உள்ளிட்ட முன்னணி தொழில்நுட்பத் துறைத் தலைவர்கள் பில்கேட்ஸின் ரோபோக்களுக்கு வரி விதிக்கும் யோசனைக்கு எதிர்ப்புத் தெரிவித்துள்ளமை குறிப்பிடத்தக்கது.
