எகிப்தின் தலைநகர் கெய்ரோவுக்கு தெற்கே கிசா மாகாணத்தின் அல்-அய்யாத் (Al-Ayyat) பகுதியில் ஞாயிற்றுக்கிழமை (08) இடம்பெற்ற இரு பயணிகள் ரயில்கள் மோதிய விபத்தில் ஏழு பேர் உயிரிழந்துள்ளதுடன், 125 பேர் காயமடைந்துள்ளனர்.
கிசாவிலிருந்து ஃபயூம் நோக்கிப் பயணித்த ரயில், கெய்ரோவிலிருந்து அஸ்வான் நோக்கிச் சென்ற மற்றொரு ரயிலின் பின்பகுதியில் மோதியதில் பல ரயில் பெட்டிகள் தடம்புரண்டதாக எகிப்தின் தேசிய ரயில்வே நிர்வாகம் தெரிவித்துள்ளது.
இந்த விபத்தைத் தொடர்ந்து 72 அவசர ஊர்திகள் சம்பவ இடத்திற்கு அனுப்பப்பட்டு, காயமடைந்தவர்கள் அருகிலுள்ள வைத்தியசாலைகளில் அனுமதிக்கப்பட்டுள்ளனர். அவர்களில் பலர் சிகிச்சையின் பின்னர் வீடு திரும்பியுள்ளதாகவும் சுகாதார அமைச்சு தெரிவித்துள்ளது.
இதற்கிடையில், விபத்துக்கான தொழில்நுட்பக் காரணங்களைக் கண்டறிவதற்காக எகிப்தின் அரச வழக்கறிஞர் அலுவலகம் விசாரணைகளை ஆரம்பித்துள்ளது. அத்துடன், விபத்துக்குப் பொறுப்பானவர்கள் அடையாளம் காணப்பட்டு நடவடிக்கை எடுக்கப்பட வேண்டும் என ஜனாதிபதி அப்தெல் ஃபத்தாஹ் அல்-சிசி உத்தரவிட்டுள்ளார்.
எகிப்தில் பிராந்தியத்தின் மிகப் பழமையான மற்றும் மிகப்பெரிய ரயில்வே கட்டமைப்புகளில் ஒன்று காணப்படுகின்ற போதிலும், அங்கு உயிரிழப்புகளை ஏற்படுத்தும் ரயில் விபத்துகள் அடிக்கடி இடம்பெற்று வருகின்றன. இதனை நவீனமயப்படுத்துவதற்காக அரசாங்கம் பெருமளவிலான நிதியை முதலீடு செய்து வருகிறது.
இதேவேளை, எகிப்தின் வரலாற்றில் மிக மோசமான ரயில் விபத்தாகக் கருதப்படும் 2002ஆம் ஆண்டு இடம்பெற்ற விபத்தில், பயணிகள் ரயிலின் ஏழு பெட்டிகளில் தீ பரவியதில் குறைந்தது 360 பேர் உயிரிழந்தமை குறிப்பிடத்தக்கது.
