மட்டக்களப்பில் கடந்த 2008ஆம் ஆண்டு இடம்பெற்ற ஐந்து கொலைச் சம்பவங்கள் தொடர்பில் கைது செய்யப்பட்ட முன்னாள் இராஜாங்க அமைச்சர் சிவநேசதுரை சந்திரகாந்தன் எனப்படும் பிள்ளையான் உள்ளிட்ட மூவரையும் எதிர்வரும் 23ஆம் திகதி வரை மீண்டும் விளக்கமறியலில் வைக்குமாறு மட்டக்களப்பு நீதவான் நீதிமன்றம் உத்தரவிட்டுள்ளது.
2008ஆம் ஆண்டு கல்லடி, காத்தான்குடி மற்றும் வவுணதீவு ஆகிய பகுதிகளில் இடம்பெற்ற துப்பாக்கிச் சூடு மற்றும் கடத்தல் சம்பவங்களுடன் தொடர்புடையதாகக் கூறியே இந்த வழக்கு விசாரணை முன்னெடுக்கப்பட்டு வருகின்றது.
குறித்த சம்பவங்களில் பொலிஸ் உத்தியோகத்தர் ஒருவர் உள்ளிட்ட ஐவர் கொல்லப்பட்டிருந்தனர். இந்தக் கொலைகள் தொடர்பாக பிள்ளையான் உள்ளிட்டோர் மீது குற்றச்சாட்டுகள் முன்வைக்கப்பட்டுள்ளன.
இவ்வழக்கு தொடர்பில் பயங்கரவாதத் தடைச் சட்டத்தின் கீழ் கைது செய்யப்பட்ட பிள்ளையான் மற்றும் காத்தான்குடியைச் சேர்ந்த இராணுவப் புலனாய்வுப் பிரிவின் தகவலாளிகளான மொஹமட் சிபான், மொஹமட் சகீத் ஆகியோர் தொடர்ந்தும் விளக்கமறியலில் வைக்கப்பட்டுள்ளனர்.
இந்நிலையில், குறித்த வழக்கு இன்று (10) மட்டக்களப்பு நீதவான் நீதிமன்றத்தில் விசாரணைக்கு எடுத்துக்கொள்ளப்பட்டது.
இதன்போது, சந்தேகநபர்களான மொஹமட் சிபான் மற்றும் மொஹமட் சகீத் ஆகியோர் நீதிமன்றத்தில் நேரடியாக ஆஜர்படுத்தப்பட்டதுடன், பிள்ளையான் காணொளி தொழில்நுட்பம் ஊடாக நீதிமன்ற விசாரணையில் முன்னிலைப்படுத்தப்பட்டார்.
இதனையடுத்து, வழக்கின் மேலதிக விசாரணைகளைக் கருத்திற்கொண்டு பிள்ளையான் உள்ளிட்ட மூன்று சந்தேகநபர்களையும் எதிர்வரும் 23ஆம் திகதி வரை விளக்கமறியலில் வைக்குமாறு நீதவான் உத்தரவிட்டுள்ளார்.
குறித்த ஐந்து கொலைச் சம்பவங்கள் தொடர்பான விசாரணைகள் குற்றப்புலனாய்வுத் திணைக்களத்தினால் தொடர்ந்து முன்னெடுக்கப்பட்டு வருகின்றன.
