அநுராதபுரம், ரம்பேவ பகுதியில் மூன்று பேருந்துகள் மோதி இடம்பெற்ற கோர விபத்து தொடர்பில் விரிவான விசாரணைகளை முன்னெடுத்து, அதன் அறிக்கையை நீதிமன்றத்தில் சமர்ப்பிக்குமாறு அநுராதபுரம் மேலதிக நீதவான் டி.எல். சமரசிங்க, மிகிந்தலை பொலிஸாருக்கு உத்தரவிட்டுள்ளார்.
இந்த விபத்து தொடர்பில் பொலிஸார் நீதிமன்றத்தில் சமர்ப்பித்த பி-அறிக்கையைப் பரிசீலித்த மேலதிக நீதவான், விபத்து இடம்பெற்ற இடத்தையும் விபத்துக்குள்ளான மூன்று பேருந்துகளையும் நேரில் சென்று பார்வையிட்டுள்ளார்.
இதன்போது, விபத்துக்குள்ளான ஒவ்வொரு பேருந்தையும் மோட்டார் வாகன பரிசோதகர் மூலம் தனித்தனியாக ஆய்வு செய்து, அதற்கான அறிக்கைகளை நீதிமன்றத்தில் சமர்ப்பிக்குமாறும் பொலிஸாருக்கு அறிவுறுத்தப்பட்டுள்ளது.
தொடர்ந்து அநுராதபுரம் போதனா வைத்தியசாலைக்குச் சென்ற மேலதிக நீதவான், விபத்தில் உயிரிழந்தவர்களின் சடலங்களையும் பார்வையிட்டுள்ளார்.
அத்துடன், உயிரிழந்தவர்களுக்கான பிரேத பரிசோதனைகளை மேற்கொண்டு உரிய அறிக்கைகளை நீதிமன்றத்தில் சமர்ப்பிக்குமாறு விசேட சட்ட வைத்திய அதிகாரிக்கு உத்தரவிட்டுள்ளார். பிரேத பரிசோதனைகளின் பின்னர் சடலங்களை உறவினர்களிடம் ஒப்படைக்கவும் பணிப்புரை விடுக்கப்பட்டுள்ளது.
ஏ-9 வீதியின் ரம்பேவ பகுதியில் நேற்று (10) இடம்பெற்ற இந்தக் கோர விபத்தில் நால்வர் உயிரிழந்ததுடன், மேலும் 71 பேர் காயமடைந்துள்ளனர்.
இலங்கை போக்குவரத்துச் சபைக்குச் சொந்தமான இரண்டு பேருந்துகளும் தனியார் பேருந்து ஒன்றும் ஒன்றுடன் ஒன்று மோதியதில் இந்த விபத்து இடம்பெற்றுள்ளது.
ஆரம்பகட்ட பொலிஸ் விசாரணைகளின்படி, ஒரு பேருந்தின் சாரதி ஆபத்தான முறையிலும் கவனக்குறைவாகவும் வாகனத்தை செலுத்தியமையே விபத்துக்குக் காரணமாக இருக்கலாம் எனத் தெரிவிக்கப்பட்டுள்ளது.
வவுனியாவிலிருந்து ரம்பேவ நோக்கிப் பயணித்த இலங்கை போக்குவரத்துச் சபை பேருந்து ஒன்று, அதே திசையில் சென்ற தனியார் பேருந்தை முந்திச் செல்ல முற்பட்டபோது, எதிர்திசையில் வந்த மற்றுமொரு இலங்கை போக்குவரத்துச் சபை பேருந்துடன் நேருக்கு நேர் மோதியதில் இந்த விபத்து நேர்ந்துள்ளதாக ஆரம்பகட்ட விசாரணைகளில் தெரியவந்துள்ளது.
