அஸ்வெசும நலன்புரி உதவிக்குத் புதிதாகத் தெரிவு செய்யப்பட்ட பயனாளிகளுக்கான வங்கிக் கணக்குகளைத் திறத்தல் மற்றும் தகவல்களை உறுதிப்படுத்தும் நடவடிக்கைகள் இன்று (17) முதல் ஆரம்பிக்கப்பட்டுள்ளதாக நலன்புரி நன்மைகள் சபை அறிவித்துள்ளது.
மேன்முறையீடுகள் மற்றும் ஆட்சேபனைகள் பரிசீலிக்கப்பட்டு வெளியிடப்பட்ட புதிய பயனாளிகள் பட்டியலில் பெயர் இடம்பெற்றுள்ளவர்கள், தமக்குரிய பிரதேச செயலகத்தின் ஊடாக வங்கிக் கணக்கைத் திறப்பதற்கான பரிந்துரைக் கடிதத்தைப் பெற்றுக்கொள்ள முடியும்.
புதிய பயனாளிகள் அஸ்வெசும கொடுப்பனவுகளுக்காகப் பிரத்தியேக சமூகப் பாதுகாப்புக் கணக்கொன்றை அரச வங்கியில் ஆரம்பிக்க வேண்டும். கணக்கைத் திறந்த பின்னர் அதன் விபரங்களைப் பிரதேச செயலகத்தில் சமர்ப்பித்து புதுப்பிப்பதும் கட்டாயமாகும்.
ஏற்கனவே அஸ்வெசும வங்கிக் கணக்கு செயலில் உள்ளவர்கள் புதிதாகக் கணக்கொன்றைத் திறக்கத் தேவையில்லை எனவும் அறிவிக்கப்பட்டுள்ளது.
மேலும், பயனாளிகள் தங்களது வங்கிக் கணக்குத் தகவல்களைச் சரிபார்ப்பதற்கு அனுமதியளிக்கும் சத்தியக் கடிதத்தையும் சமர்ப்பிக்க வேண்டும்.
புதிய மற்றும் இரண்டாம் கட்ட அஸ்வெசும பயனாளிகளுக்கான நவம்பர் மாதக் கொடுப்பனவை எதிர்வரும் நவம்பர் 27ஆம் திகதி வழங்குவதற்கு நலன்புரி நன்மைகள் சபை திட்டமிட்டுள்ளது.







