ஹட்டன், வட்டவளை பகுதியில் அமைந்துள்ள டெம்பஸ்டோவ் தோட்டப் பாடசாலையில் இன்று (17) காலை வழங்கப்பட்ட உணவை உட்கொண்ட 35 மாணவர்கள் சுகவீனமடைந்து வைத்தியசாலையில் அனுமதிக்கப்பட்டுள்ளனர்.
குறித்த மாணவர்கள் வாந்தி, மயக்கம் மற்றும் நெஞ்சுவலி உள்ளிட்ட ஒவ்வாமை அறிகுறிகளால் பாதிக்கப்பட்டதைத் தொடர்ந்து வட்டவளை பிரதேச வைத்தியசாலையில் அனுமதிக்கப்பட்டுள்ளதாக வைத்தியசாலை தகவல்கள் தெரிவிக்கின்றன.
பாடசாலையில் மாணவர்களுக்கு காலை உணவாக சோறு, உருளைக்கிழங்கு கறி, பீட்ரூட் கறி மற்றும் கீரை வகையொன்று வழங்கப்பட்டுள்ளதாகத் தெரிவிக்கப்படுகிறது.

இச்சம்பவத்தில் 3ஆம் தரம் முதல் 5ஆம் தரம் வரை கல்வி பயிலும் மாணவர்களே பாதிக்கப்பட்டு வைத்தியசாலையில் அனுமதிக்கப்பட்டுள்ளனர்.
எனினும், வைத்தியசாலையில் அனுமதிக்கப்பட்ட மாணவர்களின் உடல்நிலை கவலைக்கிடமாக இல்லை என மாவட்ட வைத்தியர் தெரிவித்துள்ளார்.
சம்பவம் தொடர்பில் வட்டவளை பொலிஸார் மற்றும் பொது சுகாதாரப் பரிசோதகர்கள் இணைந்து மேலதிக விசாரணைகளை முன்னெடுத்து வருகின்றனர்.








