நாட்டில் மாகாணசபைத் தேர்தலை நடத்துவதற்கு அரசாங்கம் தயாராக உள்ளதா என்றும், அதற்கான நிதியை ஒதுக்கீடு செய்யுமா என்றும் ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீம் நாடாளுமன்றத்தில் காட்டமாகக் கேள்வி எழுப்பியுள்ளார்.
வரவு செலவுத் திட்டத்தின் இரண்டாம் நாள் விவாதத்தில் உரையாற்றிய அவர், ஜனாதிபதியின் வரவு செலவுத் திட்ட உரையில் மாகாணசபைத் தேர்தல் தொடர்பாக ஒரு வார்த்தைகூட இடம்பெறவில்லை என விமர்சித்தார்.
மேலும், தமிழ் மக்களின் நினைவேந்தல் உரிமைகள் மதிக்கப்பட வேண்டும் என்றும், சர்வதேச நாணய நிதியத்துடனான ஒப்பந்தம், இந்தியாவுடனான பொருளாதாரத் திட்டங்கள் மற்றும் காங்கேசன்துறை துறைமுக அபிவிருத்தி தொடர்பிலும் அரசாங்கத்தின் நிலைப்பாட்டைக் கேள்விக்குட்படுத்தினார்.
அத்துடன், இஸ்ரேலிடமிருந்து ஆளில்லா வானூர்திகளை கொள்வனவு செய்யும் தீர்மானத்தையும் விமர்சித்த அவர், கொள்முதல் நடவடிக்கைகளில் வெளிப்படைத்தன்மை அவசியம் என வலியுறுத்தினார்.
விளையாட்டு வீரர்களுக்கு உரிய அங்கீகாரமும் நிதியுதவியும் வழங்கப்பட வேண்டும் என்றும் அவர் தனது உரையில் குறிப்பிட்டார்.







