தஞ்சாவூர் பெரிய கோவிலை உலக அதிசயங்கள் பட்டியலில் இடம்பெறச் செய்ய பரிந்துரை செய்யப்படும் என நாடாளுமன்ற நிலைக்குழுத் தலைவர் சஞ்சய் குமார் ஜா தெரிவித்துள்ளார். இந்த அறிவிப்பு தமிழர்களிடையே பெரும் மகிழ்ச்சியை ஏற்படுத்தியுள்ளது.
மத்திய போக்குவரத்து, சுற்றுலா மற்றும் கலாசாரத்துக்கான நாடாளுமன்ற நிலைக்குழுத் தலைவர் சஞ்சய் குமார் ஜா தலைமையிலான எம்.பி.க்கள் குழுவினர் தஞ்சாவூர் மாவட்டத்தில் சுற்றுப்பயணம் மேற்கொண்டனர். இதன் ஒரு பகுதியாக, வரலாற்றுச் சிறப்புமிக்க கல்லணை மற்றும் தஞ்சாவூர் பெரிய கோவில் உள்ளிட்ட இடங்களைப் பார்வையிட்டு ஆய்வு செய்தனர்.
பின்னர் பெரிய கோவிலின் கட்டிடக்கலை மற்றும் அதன் வரலாற்றுச் சிறப்புகள் குறித்து பேசிய சஞ்சய் குமார் ஜா, ஆயிரம் ஆண்டுகளுக்கு முன்பே இவ்வளவு பிரம்மாண்டமான கோவிலை உருவாக்கியிருப்பது வியப்பை அளிப்பதாகக் குறிப்பிட்டார்.
மேலும், இந்தியாவின் விலைமதிப்பற்ற பொக்கிஷமாகத் திகழும் தஞ்சை பெரிய கோவில், தாஜ்மஹாலுக்கு இணையாக மட்டுமின்றி, அதன் பிரம்மாண்டத்திலும் தனித்துவமான கட்டிடக்கலைச் சிறப்பிலும் வியக்க வைப்பதாகத் தெரிவித்தார்.
ஏற்கனவே யுனெஸ்கோவின் உலகப் பாரம்பரியச் சின்னங்கள் பட்டியலில் இடம்பெற்றுள்ள பெரிய கோவிலை, உலக அதிசயங்கள் பட்டியலில் சேர்ப்பதற்காக நாடாளுமன்ற நிலைக்குழு சார்பில் பரிந்துரை செய்யப்படும் என்றும் அவர் உறுதியளித்தார்.
மாமன்னன் ராஜராஜ சோழனால் கட்டப்பட்ட தஞ்சை பெரிய கோவில், சோழர்களின் கட்டிடக்கலை மற்றும் சிற்பக்கலைத் திறமைக்கு உலகளாவிய அடையாளமாக விளங்குகிறது. ஆயிரம் ஆண்டுகளைக் கடந்தும் கம்பீரமாக நிற்கும் இக்கோவில், உலகின் பல்வேறு நாடுகளில் இருந்தும் சுற்றுலாப் பயணிகளை ஈர்த்து வருகிறது.
தற்போது பெரிய கோவிலை உலக அதிசயங்கள் பட்டியலில் இடம்பெறச் செய்ய பரிந்துரை செய்யப்படும் என்ற அறிவிப்பு, தமிழர்களின் வரலாற்றுப் பெருமைக்கு மேலும் ஒரு அங்கீகாரமாகப் பார்க்கப்படுகிறது.







