தலைமன்னார் – பேசாலை கடற்பரப்பில் கடல் வழியாகத் தங்கத்தைக் கடத்த முயன்றதாகச் சந்தேகிக்கப்படும் இருவரை இலங்கை கடற்படையினர் கைது செய்துள்ளனர்.
கடந்த நவம்பர் 17ஆம் திகதி, இலங்கை கடற்படையின் வடமத்திய கடற்படை கட்டளைப் பிரிவினரால் முன்னெடுக்கப்பட்ட விசேட நடவடிக்கையின்போதே இந்தக் கைது இடம்பெற்றுள்ளது.

இதன்போது, சந்தேகநபர்கள் பயணித்த டிங்கி ரகப் படகும் கடற்படையினரால் கைப்பற்றப்பட்டுள்ளது.
கைப்பற்றப்பட்ட தங்கத்தின் அளவு மற்றும் பெறுமதி தொடர்பான விபரங்கள் இதுவரை வெளியிடப்படவில்லை.
குறித்த தங்கத் தொகையை கடல் வழியாக தென்னிந்தியாவுக்குக் கடத்த முயன்றிருக்கலாம் எனச் சந்தேகிக்கப்படும் நிலையில், சம்பவம் தொடர்பான மேலதிக விசாரணைகள் முன்னெடுக்கப்பட்டு வருகின்றன.







