இந்தியாவின் ராமேஸ்வரத்திற்கும் இலங்கையின் தலைமன்னாருக்கும் இடையில் சர்வதேச பயணிகள் படகுச் சேவையை ஆரம்பிக்குமாறு தமிழக அரசு மத்திய அரசிடம் கோரிக்கை விடுத்துள்ளது.
இந்தக் கோரிக்கை உள்ளிட்ட பல்வேறு திட்டங்கள் தொடர்பாக தமிழக அமைச்சர்கள் இருவர் நேற்று (17) செவ்வாய்க்கிழமை டெல்லியில் மத்திய அமைச்சர்களைச் சந்தித்துக் கலந்துரையாடியுள்ளனர்.
இதன்போது, பொதுப்பணி மற்றும் விளையாட்டு மேம்பாட்டுத்துறை அமைச்சர் ஆதவ் அர்ஜுனா, மத்திய துறைமுகங்கள், கப்பல் போக்குவரத்து மற்றும் நீர்வழிகள் துறை அமைச்சர் சர்பானந்த சோனோவாலைச் சந்தித்து, ஐந்து முக்கிய கடல்சார் மற்றும் நீர்வழித் திட்டங்களை நடைமுறைப்படுத்துவதற்காக 9,618 கோடி இந்திய ரூபாய் நிதியுதவி கோரும் மனுவைச் சமர்ப்பித்துள்ளார்.
இதில், ராமேஸ்வரம் துறைமுகத்தை மேம்படுத்துவதுடன், ராமேஸ்வரம் – தலைமன்னார் இடையே சர்வதேச பயணிகள் படகுச் சேவையை ஆரம்பிப்பதற்காக 118 கோடி இந்திய ரூபாய் ஒதுக்கீடு செய்யுமாறும் கோரப்பட்டுள்ளது.
மேலும், கடலூரில் புதிய ஆழ்கடல் துறைமுகம் அமைத்தல், பக்கிங்ஹாம் கால்வாயைப் புனரமைத்தல், பாம்பன் கால்வாயை ஆழப்படுத்துதல் உள்ளிட்ட திட்டங்களுக்கும் நிதியுதவி கோரப்பட்டுள்ளது.
அத்துடன், சென்னை மெரினா, மாமல்லபுரம் மற்றும் புதுச்சேரி பகுதிகளில் கடற்கரை நடைபாதைகள் மற்றும் படகுத் துறைகளை அமைப்பதற்கும், சென்னை – புதுச்சேரி இடையே பயணிகள் படகுச் சேவையை ஆரம்பிப்பதற்கும் முன்மொழியப்பட்டுள்ளது.
இதேவேளை, தமிழக பாடசாலைக் கல்வித்துறை அமைச்சர் ஏ. ராஜமோகன், மத்திய கல்வி அமைச்சர் பிரல்ஹாத் ஜோஷியைச் சந்தித்து, தமிழகத்திற்கு வழங்கப்பட வேண்டிய கல்வித் திட்டங்களுக்கான நிலுவை நிதியை உடனடியாக விடுவிக்குமாறும் கோரிக்கை விடுத்துள்ளார்.
ராமேஸ்வரம் – தலைமன்னார் இடையிலான படகுச் சேவை ஆரம்பிக்கப்பட்டால், இந்தியா மற்றும் இலங்கை இடையிலான பயணிகள் போக்குவரத்து மற்றும் கடல்வழி இணைப்பை மேம்படுத்துவதற்கான வாய்ப்பு ஏற்படும் என எதிர்பார்க்கப்படுகிறது.







