சர்வதேச ‘அல்பாலைனர்’ (Alphaliner) நிறுவனத்தின் தரவரிசைப்படி, உலகின் மிகவும் பரபரப்பான கொள்கலன் துறைமுகங்களில் கொழும்பு துறைமுகம் 20 ஆவது இடத்திற்கு முன்னேறி புதிய சாதனையைப் பதிவு செய்துள்ளது.
இலங்கை துறைமுக அதிகாரசபை வெளியிட்டுள்ள தகவலின்படி, நடப்பு ஆண்டின் முதல் பத்து மாதங்களில் கொழும்பு துறைமுகத்தின் கொள்கலன் கையாளும் நடவடிக்கைகளில் குறிப்பிடத்தக்க வளர்ச்சி ஏற்பட்டுள்ளது.
கடந்த ஆண்டு இதே காலப்பகுதியில் 5,825,909 கொள்கலன்கள் கையாளப்பட்ட நிலையில், இவ்வாண்டு அந்த எண்ணிக்கை 6,406,363 ஆக அதிகரித்துள்ளது.
இதன் மூலம் கடந்த ஆண்டுடன் ஒப்பிடுகையில் 580,454 மேலதிக கொள்கலன்கள் கையாளப்பட்டுள்ளதுடன், கணிசமான வளர்ச்சியும் பதிவாகியுள்ளது.
குறிப்பாக, ஒக்டோபர் மாதத்தில் கொள்கலன் கையாளும் நடவடிக்கைகள் 9.6 சதவீதத்தால் அதிகரித்துள்ளன. கடந்த ஆண்டு ஒக்டோபர் மாதத்தில் 620,830 கொள்கலன்கள் கையாளப்பட்ட நிலையில், இவ்வாண்டு அதே மாதத்தில் 680,125 கொள்கலன்கள் கையாளப்பட்டுள்ளன.
இதன்படி, கடந்த ஆண்டின் ஒக்டோபர் மாதத்துடன் ஒப்பிடுகையில் இம்முறை 59,295 மேலதிக கொள்கலன்கள் கையாளப்பட்டுள்ளன.
இதேவேளை, மீள்ஏற்றுமதி (Transshipment) கொள்கலன் நடவடிக்கைகளிலும் இவ்வாண்டின் முதல் பத்து மாதங்களில் 10 சதவீத வளர்ச்சி பதிவாகியுள்ளதாக இலங்கை துறைமுக அதிகாரசபை தெரிவித்துள்ளது.
சர்வதேச கப்பல் போக்குவரத்துத் துறையின் முன்னணி தரப்படுத்தல் நிறுவனமான அல்பாலைனரின் தரவரிசையில், கடந்த ஆண்டு இறுதியில் 26 ஆவது இடத்தில் இருந்த கொழும்பு துறைமுகம், தற்போது 20 ஆவது இடத்திற்கு முன்னேறியுள்ளது.
இந்த முன்னேற்றம் சர்வதேச கப்பல் போக்குவரத்துத் துறையில் கொழும்பு துறைமுகத்தின் முக்கியத்துவம் மேலும் அதிகரித்து வருவதைக் காட்டுவதாகக் கருதப்படுகிறது.







