யாழ்ப்பாணம் – ஊர்காவற்துறை நீதவான் நீதிமன்றத்தில் நடைபெற்று வரும் வழக்கு விசாரணையொன்றில் சாட்சியமளிப்பதற்காகச் சென்ற ஒருவர் மீது வாள்வெட்டுத் தாக்குதல் நடத்தப்பட்டுள்ளது.
குறித்த சம்பவம் இன்று (19) அராலி சந்திக்கு அருகில் இடம்பெற்றுள்ளதாகத் தெரிவிக்கப்படுகிறது.
தாக்குதலில் படுகாயமடைந்த நபர் யாழ்ப்பாணம் போதனா வைத்தியசாலையில் அனுமதிக்கப்பட்டு சிகிச்சை பெற்று வருகின்றார்.
சம்பவம் தொடர்பில் மேலும் தெரியவருவதாவது, ஊர்காவற்துறை நீதிமன்றத்தில் நடைபெற்று வரும் வழக்கொன்றில் சாட்சியமளிப்பதற்காக குறித்த நபர் இன்று யாழ்ப்பாணத்திலிருந்து ஊர்காவற்துறை நோக்கிப் பயணித்துள்ளார்.
இதன்போது, அராலி சந்திக்கு அருகில் பயணத்தை இடைமறித்த மூவர் அடங்கிய குழுவினர் அவர் மீது சரமாரியாக வாள்வெட்டுத் தாக்குதலை மேற்கொண்டுவிட்டுத் தப்பிச் சென்றுள்ளதாகத் தெரிவிக்கப்படுகிறது.
தீவக சிவில் அமைப்பின் உப தலைவரான கருணாகரன் குணாளன் என்பவரே இவ்வாறு தாக்குதலுக்கு இலக்காகியுள்ளதாகத் தகவல்கள் தெரிவிக்கின்றன.
இந்தச் சம்பவம் தொடர்பில் ஊர்காவற்துறை பொலிஸார் மேலதிக விசாரணைகளை முன்னெடுத்து வருகின்றனர்.







