இலங்கையின் 79ஆவது தேசிய சுதந்திர தினக் கொண்டாட்டங்களை கொழும்பு சுதந்திர சதுக்கத்தில் நடத்துவதற்குத் தீர்மானிக்கப்பட்டுள்ளது.
இது தொடர்பான முதற்கட்டக் கலந்துரையாடல், பிரதமர் கலாநிதி ஹரிணி அமரசூரிய தலைமையில் நேற்று (18) அலரி மாளிகையில் நடைபெற்றது.
இதன்போது, சுதந்திர தின விழாவின் தொனிப்பொருள், நிகழ்ச்சி நிரல், ஏற்பாட்டு நடவடிக்கைகள் மற்றும் சமய நிகழ்வுகள் உள்ளிட்ட பல்வேறு விடயங்கள் தொடர்பில் விரிவாக ஆராயப்பட்டன.

இந்தக் கலந்துரையாடலில் அமைச்சர்களான ஹினிதும சுனில் செனெவி, வசந்த சமரசிங்க, சந்தன அபேரத்ன, சமந்த வித்யாரத்ன மற்றும் பிரதி அமைச்சர் பிரசன்ன குணசேன ஆகியோர் கலந்துகொண்டனர்.
மேலும், நிதி, பாதுகாப்பு, கல்வி, வலுசக்தி அமைச்சுகள் மற்றும் மேல் மாகாண சபை உள்ளிட்ட பல்வேறு அரச நிறுவனங்களின் அதிகாரிகளும் இக்கலந்துரையாடலில் பங்கேற்றனர்.
79ஆவது தேசிய சுதந்திர தின விழாவை சிறப்பாகவும் ஒழுங்கமைக்கப்பட்ட வகையிலும் நடத்துவதற்கான ஆரம்பகட்ட நடவடிக்கைகள் இதன்போது முன்னெடுக்கப்பட்டன.








