திருகோணமலை, கோமரங்கடவல சுகாதார வைத்திய அதிகாரி பிரிவில் காலாவதியான மற்றும் புழுக்கள் காணப்பட்ட உணவுப் பொருட்களை விற்பனைக்காக வைத்திருந்த ஒன்பது வர்த்தக நிலையங்களின் உரிமையாளர்களுக்கு நீதிமன்றம் அபராதம் விதித்துள்ளது.
மல்போறுவ, மதவாச்சிய, கோமரங்கடவல, கல்யாணபுர மற்றும் கல்கடவல ஆகிய பகுதிகளில் அமைந்துள்ள வர்த்தக நிலையங்களை இலக்காகக் கொண்டு விசேட உணவுப் பரிசோதனை நடவடிக்கை முன்னெடுக்கப்பட்டுள்ளது.
இதன்போது, காலாவதியான உணவுப் பொருட்கள் மற்றும் புழுக்கள் காணப்பட்ட உணவுப் பொருட்கள் விற்பனைக்காக வைக்கப்பட்டிருந்தமை கண்டறியப்பட்டதுடன், அவை அதிகாரிகளால் பறிமுதல் செய்யப்பட்டுள்ளன.
இதனைத் தொடர்ந்து, கோமரங்கடவல பொதுச் சுகாதாரப் பரிசோதகர் இந்திக சம்பத், சம்பந்தப்பட்ட ஒன்பது வர்த்தக நிலையங்களின் உரிமையாளர்களுக்கு எதிராக மொரவெவ நீதவான் நீதிமன்றில் வழக்குத் தாக்கல் செய்துள்ளார்.
குறித்த வழக்குகள் நேற்று (19) விசாரணைக்கு எடுத்துக்கொள்ளப்பட்டபோது, ஒன்பது வர்த்தக நிலைய உரிமையாளர்களும் குற்றவாளிகளாக அடையாளம் காணப்பட்டுள்ளனர்.
இதனையடுத்து, ஒவ்வொரு வர்த்தக நிலைய உரிமையாளருக்கும் தலா 10,000 ரூபாய் அபராதம் விதித்து நீதவான் உத்தரவிட்டுள்ளார்.
பொதுமக்களின் சுகாதாரத்திற்குப் பாதிப்பை ஏற்படுத்தக்கூடிய உணவுப் பொருட்களை விற்பனை செய்வதைத் தடுக்கும் நோக்கில் இவ்வாறான சோதனை நடவடிக்கைகள் முன்னெடுக்கப்பட்டு வருகின்றமை குறிப்பிடத்தக்கது.








