இலங்கைக்குக் கடத்துவதற்காக எடுத்துச் செல்லப்பட்டதாகக் கூறப்படும் 71.24 கிலோகிராம் ஹெரோயினை இந்திய வருவாய் புலனாய்வுப் பிரிவு அதிகாரிகள் சென்னையில் பறிமுதல் செய்துள்ளனர்.
இந்தச் சம்பவத்துடன் தொடர்புடைய இருவரும் கைது செய்யப்பட்டுள்ளதாக இந்திய நிதியமைச்சு அறிவித்துள்ளது.
நடப்பு ஆண்டில் இந்தியாவில் மேற்கொள்ளப்பட்ட மிகப்பெரிய தனிப்பட்ட ஹெரோயின் பறிமுதல்களில் இதுவும் ஒன்றாகும் என அமைச்சு சுட்டிக்காட்டியுள்ளது.
கிடைத்த இரகசியத் தகவலின் அடிப்படையில், கடந்த 17 மற்றும் 18ஆம் திகதிகளில் சென்னையில் அதிகாரிகள் விசேட கண்காணிப்பு மற்றும் சோதனை நடவடிக்கைகளை முன்னெடுத்துள்ளனர்.
இதன்போது, கண்காணிப்புக்கு உட்படுத்தப்பட்ட சந்தேகத்திற்கிடமான வாகனம் ஒன்றையும், அதற்குப் பாதுகாப்பாகப் பயணித்த இருசக்கர வாகனத்தையும் அதிகாரிகள் இடைமறித்து சோதனையிட்டுள்ளனர்.
இதன்போது, வெளிர் வெள்ளை நிறத் தூள் அடங்கிய 69 பொதிகள் கண்டுபிடிக்கப்பட்டதுடன், அவை ஹெரோயின் போதைப்பொருள் என அடையாளம் காணப்பட்டுள்ளன.
ஆரம்பகட்ட விசாரணைகளின்படி, சென்னையைப் போக்குவரத்து மையமாகப் பயன்படுத்தி, திருச்சிராப்பள்ளி ஊடாகக் கரையோரப் பாதையில் குறித்த போதைப்பொருளை இலங்கைக்குக் கடத்துவதற்குத் திட்டமிடப்பட்டிருந்தமை தெரியவந்துள்ளது.
சர்வதேச போதைப்பொருள் கடத்தல் வலையமைப்பை இலக்காகக் கொண்டு முன்னெடுக்கப்பட்ட இந்த நடவடிக்கை மூலம், இலங்கைக்குக் கடத்தப்படவிருந்த பெருமளவிலான ஹெரோயின் கைப்பற்றப்பட்டுள்ளதாக இந்திய நிதியமைச்சு தெரிவித்துள்ளது.







