அமெரிக்கப் பிரஜைகளைக் குறிவைத்து சர்வதேச அளவில் மோசடிகளில் ஈடுபடும் வலையமைப்புகள் தொடர்பான விசாரணைகளுக்கு உதவுவதற்காக, அமெரிக்காவின் மத்திய புலனாய்வுப் பணியகம் (FBI) மற்றும் நீதித்திணைக்களத்தின் (DOJ) அதிகாரிகள் இலங்கைக்கு விஜயம் செய்துள்ளனர்.
கடந்த நவம்பர் 16ஆம் திகதி முதல் 22ஆம் திகதி வரை இடம்பெற்ற இந்த விஜயத்தின் முக்கிய நோக்கம், இணையவழி மோசடிகள் மற்றும் நாடுகடந்த குற்ற வலையமைப்புகளை ஒழிப்பதற்காக அமெரிக்க மற்றும் இலங்கை அதிகாரிகளுக்கு இடையிலான ஒத்துழைப்பை வலுப்படுத்துவதாகும் என கொழும்பிலுள்ள அமெரிக்கத் தூதரகம் தெரிவித்துள்ளது.
இந்த விஜயத்தின்போது, அமெரிக்க அதிகாரிகள் சட்டமா அதிபர் திணைக்களம் மற்றும் இலங்கைப் பொலிஸின் கணினி குற்றப் புலனாய்வுப் பிரிவு (CCIU), மத்திய குற்றப் புலனாய்வுப் பணியகம் (CCIB), தொழில்நுட்ப உதவிப் பிரிவு (TAU) உள்ளிட்ட விசேட பிரிவுகளுடன் கலந்துரையாடியுள்ளனர்.
இதன்போது, இலங்கையில் இயங்கிய இரண்டு மோசடி மையங்கள் தொடர்பான விசாரணைகள் மீளாய்வு செய்யப்பட்டதுடன், டிஜிட்டல் ஆதாரங்களைப் பெறுவதற்காக 80 இற்கும் மேற்பட்ட இலத்திரனியல் சாதனங்களும் பரிசோதிக்கப்பட்டுள்ளன.
மேலும், இலங்கைப் பொலிஸாரால் மேற்கொள்ளப்பட்ட சுற்றிவளைப்புகளின்போது கைப்பற்றப்பட்ட டிஜிட்டல் ஆதாரங்களைப் பிரித்தெடுத்தல், விசாரணை உத்திகளை மீளாய்வு செய்தல் மற்றும் டிஜிட்டல் ஆதாரங்களைக் கையாள்வது தொடர்பான பயிற்சிகளை வழங்குதல் போன்ற நடவடிக்கைகளும் முன்னெடுக்கப்பட்டுள்ளன.
இவ்வாறான நாடுகடந்த குற்ற வலையமைப்புகள் உலகளாவிய ரீதியில் பாதிக்கப்பட்டவர்களிடமிருந்து பில்லியன் கணக்கான டொலர்களை மோசடி செய்து வருவதாக அமெரிக்கத் தூதரகம் சுட்டிக்காட்டியுள்ளது.
இந்த மோசடி வலையமைப்புகளை முறியடிப்பதற்காக, அமெரிக்க மற்றும் இலங்கை அதிகாரிகள் தொடர்ந்து தகவல்களைப் பரிமாறிக் கொள்வதுடன், விசாரணைகளை முன்னெடுத்து குற்றவாளிகளுக்கு எதிரான சட்ட நடவடிக்கைகளை வலுப்படுத்தவுள்ளதாகவும் தெரிவிக்கப்பட்டுள்ளது.
இரு நாடுகளிலும் உள்ள பொதுமக்களைப் பாதுகாப்பதுடன், இணையவழி மோசடிகளில் ஈடுபடுவோரைச் சட்டத்தின் முன் நிறுத்துவதே இந்த ஒத்துழைப்பின் பிரதான நோக்கம் என அமெரிக்கத் தூதரகம் மேலும் தெரிவித்துள்ளது.







