அஸ்வெசும நலன்புரி உதவித்திட்டத்தின் கீழ் நிதியுதவிகளைப் பெறும் பயனாளிகள், வங்கிகள் மற்றும் நிதி நிறுவனங்களில் தங்களது பெயரில் உள்ள நிதி தொடர்பான விபரங்களை வெளிப்படுத்தும் பிரமாணப் பத்திரத்தை (Affidavit) சமர்ப்பிப்பது கட்டாயமாக்கப்பட்டுள்ளது.
கிராம உத்தியோகத்தர்களால் மேற்கொள்ளப்பட்ட ஆய்வுகளின்போது, சில பயனாளிகள் தங்களது நிதிச் சொத்துக்கள் தொடர்பான விபரங்களைச் சமர்ப்பிக்கத் தவறியமை கண்டறியப்பட்டதைத் தொடர்ந்து இந்த நடவடிக்கை எடுக்கப்பட்டுள்ளதாக அஸ்வெசும நலன்புரி நன்மைகள் சபையின் தலைவர் தெரிவித்துள்ளார்.
இதற்கமைய, தற்போதைய பயனாளிகள், புதிய விண்ணப்பதாரர்கள் மற்றும் அஸ்வெசும தொடர்பில் மேன்முறையீடு செய்தவர்கள் என அனைவரும் குறித்த பிரமாணப் பத்திரத்தைச் சமர்ப்பிக்க வேண்டும் என அறிவிக்கப்பட்டுள்ளது.
சிலர் வட்டிக்குக் கடன் வழங்குதல் போன்ற வெளிப்படுத்தப்படாத வருமான வழிகள் மூலம் பணம் ஈட்டி, அவற்றை மறைப்பதற்காக வங்கிக் கணக்குகளைப் பராமரிப்பதாகத் தகவல்கள் கிடைத்துள்ளதாகவும் சபையின் தலைவர் குறிப்பிட்டுள்ளார்.
எனவே, மறைக்கப்பட்ட நிதி தொடர்பில் ஆட்சேபனைகள் அல்லது தகவல்கள் வெளிவரும் சந்தர்ப்பங்களில், விண்ணப்பதாரர்களின் வங்கிக் கணக்குகளை கணினி முறைமையின் ஊடாகச் சரிபார்ப்பதற்கு அதிகாரிகளுக்கு அனுமதி வழங்கும் வகையிலான சம்மதத்தையும் பிரமாணப் பத்திரத்தில் குறிப்பிட வேண்டும் எனத் தெரிவிக்கப்பட்டுள்ளது.
அரசாங்கத்தின் நலன்புரி நிதியுதவிகள் உண்மையில் உதவி தேவைப்படும் மக்களுக்கு நியாயமான முறையில் சென்றடைவதை உறுதிப்படுத்தும் நோக்கிலேயே இந்த நடவடிக்கை முன்னெடுக்கப்படுவதாக அஸ்வெசும நலன்புரி நன்மைகள் சபையின் தலைவர் மேலும் தெரிவித்துள்ளார்.







