மட்க்களப்பு மாவட்டத்திலுள்ள பொலிஸ் நிலையங்களை புனரமைக்கும் திட்டத்தின் கீழ் காத்தான்குடி பொலிஸ் நிலையம் உட்பட 12 பொலிஸ் நிலையங்களின் புனரமைக்கப்பட்ட கட்டிடங்களை வைபவரீதியாக பொலிஸ் மா அதிபர் பிரியந்த வீரசூரிய நேற்று சனிக்கிழமை (21) திறந்து வைத்தார்.
பாசிக்குடா, வாழைச்சேனை, மட்டக்களப்பு, களுவாஞ்சிக்குடி, ஆயித்தியமலை, மங்களகம, வவுணதீவு, கொக்குவில், உட்பட 11 பொலிஸ் நிலையங்களின் பொறுப்பதிகாரிகளுக்கு தங்குமிட விடுதி மற்றும் காத்தான்குடி பொலிஸ் நிலைய கட்டிட தொகுதி, தங்குமிட விடுதி உட்பட்ட கட்டிடங்கள் புனரமைக்கப்பட்டு வைபவ ரீதியாக பொலிஸ் மா அதிபரால் திறந்துவைக்கும் பிரதான நிகழ்வு காத்தான்குடி பொலிஸ் நிலையத்தில் இடம்பெற்றது.

இதன் போது காத்தான்குடி பொலிஸ் நிலையத்திற்கு வருகை தந்த பொலிஸ் மா அதிபருக்கு பொலிஸாரின் அணிவகுப்பு மரியாதை இடம்பெற்றதுடன், அதனைப் பொலிஸ் மா அதிபர் ஏற்றுக்கொண்டார்.

இதையடுத்து, புதிதாக நிர்மாணிக்கப்பட்ட காத்தான்குடி பொலிஸ் நிலையப் பொறுப்பதிகாரியின் உத்தியோகபூர்வ தங்குமிட கட்டிடம் மற்றும் பொலிஸ் நிலைய கட்டிடம் ஆகியவற்றை சமயப் பிரமுகர்களின் ஆசியுடன் பொலிஸ் மா அதிபர் திறந்து வைத்த பின்னர் பொலிஸ் நிலைய வளாகத்தையும் அவர் பார்வையிட்டார்.

இதன்போது, காத்தான்குடி வர்த்தக சமூகத்தின் சார்பில் பொலிஸ் மா அதிபருக்கு பொன்னாடை போர்த்தப்பட்டு, பித்தளையினால் செய்யப்பட்ட வாள் நினைவுச் சின்னம் வழங்கி கௌரவிக்கப்பட்டார். அத்துடன், கலந்து கொண்ட பொலிஸ் உயரதிகாரிகளுக்கு பொன்னாடை போர்த்தி நினைவுச் சின்னங்கள் வழங்கி கௌரவிக்கப்பட்டனர்.

இந்நிகழ்வில் கிழக்கு மாகாண பிரதிப் பொலிஸ் மா அதிபர் சம்பத் குமார் லியனகே, மட்டக்களப்பு மாவட்ட பொலிஸ் அத்தியட்சகர் லலித் லீலாரத்ன, உதவிப் பொலிஸ் அத்தியட்சகர் ஜருஸ் உள்ளிட்ட பொலிஸ் உயர் அதிகாரிகள், காத்தான்குடி பொலிஸ் நிலையப் பொறுப்பதிகாரி, மட்டக்களப்பு மாநகர சபை மேயர், காத்தான்குடி நகர சபைத் தவிசாளர், ஆரையம்பதி பிரதேச சபைத் தவிசாளர், தமிழ், முஸ்லிம் சமய மற்றும் சமூகப் பிரமுகர்கள், வர்த்தக சங்கப் பிரதிநிதிகள் உள்ளிட்ட பலரும் கலந்து கொண்டனர்.








