வடக்கு ஆளுநர் ஜீவன் தியாகராஜா தனது பதவியைத் தக்கவைத்துக்கொள்வ தற்காக பேரினவாதத்தின் தமிழர் மீதான திட்டமிட்ட இனவழிப்புக்கு துணை போகிறார் என்று பாராளுமன்ற உறுப்பினர் செல்வராசா கஜேந்திரன் தெரிவித்துள்ளார்.
யாழ். மாநகர சபையின் ஆளுகைக்கு உட்பட்ட நாவ லர் கலாசார மண்டபத்தை ஆளுநர் மத்திய அரசாங்கத்துக்கு வழங்கியமைக்கு எதிர்ப்புத் தெரிவித்து அவரின் செயலகம் முன்பாக நேற்று
தமிழ்த் தேசிய மக்கள் முன்னணி போராட்டம் நடத்தியது. இதன்போது, ஊடகங்களுக்கு கருத்து வெளியிட்ட
போதே அவர் மேற்கண்டவாறு கூறினார்.மேலும், யாழ்ப்பாணத்தில் இருக்கக் கூடிய நாவலர் கலாசார மண்டபம் என்பது தமிழர்களின் பூர்வீக அடையாளங்களில் ஒன்று. அந்த வரலாற்று அடையாளத்தை புத்தசாசன அமைச்சின் கீழ் வருகின்ற திணைக்களம் ஒன்றுக்கு வழங்குவதன் மூலமாக படிப்படியாக சிங்கள – பௌத்த ஆதிக்க விரிவாக்கத்துக்கு உதவுகின்ற நோக்கத்துடன் வடக்கு ஆளுநர் செயல்படுகிறார்.
ஆளுநருடைய இந்த தான்தோன்றித்தனமான இனவாதத்துக்கு எடுபிடியாக மேற்கொள்ளப்படுகின்ற இந்த நடவடிக்கையை நாங்கள் மிகவும் வன்மையாகக் கண்டிக்கின்றோம்.
அவர் தன்னை ஒரு தமிழனாக கூறிக் கொள்கின்ற பொழுதிலும் ஓர் இனத்தின் கருவை அறுத்து இனத்தின் குரல் வளையை நசுக்கி இனத்தின் இரத்தத்திலும் அவலத் திலும் பதவி சுகங்களை அனுபவிப்பதற்காக மீண்டும் ரணிலுடைய பாதங்களை கழுவி பணிவிடை செய்து பேரினவாதத்தை திருப்திப்படுத்தி மீண்டும் இந்த பதவிகளில் நீடிப்பதற்காக இவ்வாறானதோர் அநாகரிக மான செயல்பாட்டில் ஈடுபடுகின்றார். அதை நாங்கள் மிகவும் வன்மையாக கண்டிக்கிறோம் – என்றார்.
