ஆரம்ப சுகாதார சேவையினை வலுப்படுத்தும் செயற்திட்டத்தின் ஊடாக நேற்று 14 மட்டக்களப்பு மாவடிவேம்பு பிரதேச வைத்தியசாலை வைத்தியர்கள் மற்றும் தாதிய உத்தியோகத்தர்கள், அபிவிருத்தி உத்தியோகத்தர்கள், வைத்தியசாலை ஊழியர்கள் மற்றும் கிராம நலன் விரும்பிகள், வைத்தியசாலை நிர்வாகத்தினர் மற்றும் நீரிழிவு கிளினிக் பயனாளிகள் அனைவரின் பங்குபற்றுதலுடன் உலக நீரிழிவு தின விழிப்புணர்வு நடை பவனி இடம்பெற்றது.
நேற்று காலை 9 மணி அளவில் மாவடிவேம்பு பிரதேச வைத்தியசாலையில் இருந்து ஆரம்பமாகி, பிரதான வீதி வழியாக வந்தாறுமூலை பொதுச் சந்தைக்கு முன்பாக கூடி, மீண்டும் பிரதான வீதி ஊடாக சென்று, வைத்தியசாலையை அடைந்தனர்.
மாவடிவேம்பு பிரதேச வைத்தியசாலைக்கு பொறுப்பான வைத்திய அதிகாரி திருமதி வி. தனுஷியா தலைமையில் நடைபெற்ற இந்த நடை பவணி நிகழ்வில் வைத்தியர்களான திருமதி குணமணி திரு.எம். அப்துல் ஹக், பொறுப்பு தாதிய உத்தியோகத்தர், முன்னாள் ஏறாவூர் பற்றுப் பிரதேச சபை உறுப்பினர் புத்தி சிகாமணி சசி அவர்களும் கிராமம் சார்பாக பலரும் இந்த நடைபவனியில் கலந்து கொண்டனர்.
