முல்லைத்தீவில் வாய்க்காலில் குளித்துக் கொண்டிருந்த இளம் பெண்களை கையடக்க தொலைபேசியில் காணொளி எடுத்த இளைஞர்களில் ஒருவர் மக்களால் நையப்புடைக்கப்பட்டு, எச்சரிக்கப்பட்டுள்ளார்.
இந்த சம்பவம் நேற்றைய தினம் (11) காலை இடம்பெற்றுள்ளது.சம்பவம் தொடர்பில் மேலும் தெரியவருவதாவது,
யாழ் பல்கலைக்கழகத்தில் கல்வி பயிலும் மாணவிகள் சிலர், புதுக்குடியிருப்பு பகுதியில் உள்ள தமது தோழியின் வீட்டிற்கு சென்றுள்ளனர்.
பின்னர், தோழியின் உறவினர் வீடு அமைந்துள்ள முத்தையன்கட்டுக்கு பகுதிக்கு சென்றிருந்த வேளைஅங்கு நீரோடும் வாய்க்காலில் மாணவிகள் குளித்துள்ளளனர். இந்தநிலையில் மோட்டார் சைக்கிளில் வந்த இரு இளைஞர்கள் மாணவிகளுடன் ஆபாசமாக பேசியுள்ளனர்.
சிறிது தூரம் சென்று மீண்டும் மோட்டார் சைக்கிளில் வந்த இளைஞர்கள் இருவரும், மாணவிகள் குளிப்பதை தொலைபேசியில் வீடியோ எடுத்ததுடன், தொடர்ந்தும் அந்த பகுதியை சுற்றி வட்டமடித்து வீடியோ எடுத்துள்ளனர்.
இதன்போது, மாணவியொருவர் குளிப்பதற்காக கொண்டு வந்த அலுமினிய வாளியை இளைஞர்கள் மீது வீசியுள்ளார்.
குறித்த தாக்குதலில் மோட்டார் சைக்கிளை செலுத்தி வந்தவரின் தலையில் வாளி பட்டு, இருவரும் நிலைகுலைந்து சரிந்து விழுந்துள்ளனர். இதனால் மாணவிகள் சத்தமிட்டபடி வீதிக்கு ஓடிவர, மோட்டார் சைக்கிளை செலுத்தி வந்தவர் எழுந்து மோட்டார் சைக்கிளை எடுத்துக்கொண்டு ஓடியுள்ளனர்.
இதனால் பின்னால் இருந்து வீடியோ எடுத்தவரை மாணவிகள் பிடித்துக் கொள்ள, இந்த களேபரத்தை அவதானித்த பிரதேச இளைஞர்கள் சிலர் அங்கு வந்து அந்த இளைஞனை நையப்புடைத்துள்ளனர்.
அதேசமயம் அவரது கையடக்க தொலைபேசியில் காணப்பட்ட மாணவிகளின் காணொளிகள் அழிக்கப்பட்டதுடன், மாணவிகளும் அவரை சரமாரியாக தாக்கி எச்சரிக்கப்பட்டு விடுவிக்கப்பட்டுள்ளார்.
