எமது கோரிக்கைக்கான தீர்வு வழங்கப்படாவிட்டால் எமது போராட்டம் இன்னும் வலுப்பெற்று அடுத்த கட்டத்திற்கு முன்கொண்டு செல்லவேண்டிய நிலையேற்படும் என மட்டக்களப்பு மாவட்ட இலங்கை வங்கி ஊழியர் சங்க தலைவர் கவாஸ்கரன் தெரிவித்தார்.
மட்டக்களப்பு மாவட்ட இலங்கை வங்கி ஊழியர் தொழிற்சங்கத்தினால் நேற்றைய தினம் (03) மட்டக்களப்பில் கவன ஈர்ப்பு போராட்டம் ஒன்று முன்னெடுக்கப்பட்டது.
இலங்கை வங்கி ஊழியர் சங்கத்தின் முகாமைத்துவம் தீர்மானித்த கொடுப்பனவினை வழங்கு உட்பட பல்வேறு கோரிக்கைகளை வலியுறுத்தி இந்த போராட்டம் முன்னெடுக்கப்பட்டது.
மட்டக்களப்பு காந்திபூங்கா முன்பாக இந்த போராட்டம் முன்னெடுக்கப்பட்டதுடன் சம்பள அதிகரிப்பு தொடர்பான கோஷங்களும் எழுப்பப்பட்டன.
இந்த போராட்டத்தில் கலந்துகொண்டவர்கள் கூட்டு உடன்படிக்கையினை அமுல்படுத்து, அரச ஊழியுர்களின் வரிச்சுமைக்கு ஏற்ற சம்பள உயர்வினைப்பெற்றுதருக, பணிப்பாளர் சபை பரிந்துரைத்த சம்பள உயர்வினை உடன் பெற்றுத்தருக போன்ற வாசகங்கள் பொறிக்கப்பட்ட பதாகைகளை போராட்டத்தில் கலந்துகொண்டவர்கள் ஏந்தியிருந்தனர்.
