மேல் மாகாணத்தில் வாகன வருமான அனுமதிப்பத்திரங்களை (Vehicle Revenue Licence) விநியோகிக்கும் சேவைகள் நாளை (19) முதல் நவம்பர் 23ஆம் திகதி வரை தற்காலிகமாக இடைநிறுத்தப்படவுள்ளதாக அறிவிக்கப்பட்டுள்ளது.
மேல் மாகாண மோட்டார் போக்குவரத்துத் திணைக்களத்தின் eRL 01 மின்னணு சேவைக் கட்டமைப்பை மேம்படுத்தும் தொழில்நுட்பப் பணிகள் இதற்கான காரணமாகும்.
தற்போதுள்ள ‘Lanka Government Cloud 2’ கட்டமைப்பிலிருந்து மேம்படுத்தப்பட்ட ‘Lanka Government Cloud 2+’ கட்டமைப்புக்கு இந்தச் சேவை மாற்றப்படவுள்ளது. குறித்த பணிகளை GovTech Sri Lanka நிறுவனம் முன்னெடுக்கவுள்ளது.
இதன் காரணமாக, நவம்பர் 19 முதல் 23ஆம் திகதி வரை நேரடி மற்றும் இணையவழி வருமான அனுமதிப்பத்திர விநியோகச் சேவைகள் தற்காலிகமாக நிறுத்தப்படும்.
இக்காலப்பகுதியில் அனுமதிப்பத்திரங்களைப் பெற்றுக்கொள்ள முடியாத வாகன உரிமையாளர்களுக்கு நிவாரணம் வழங்கும் வகையில், நவம்பர் 25 முதல் 27ஆம் திகதி வரை எவ்வித தண்டப்பணமும் இன்றி அனுமதிப்பத்திரங்களைப் பெற்றுக்கொள்ள விசேட சலுகைக் காலம் வழங்கப்பட்டுள்ளது.
மேலும், www.motortraffic.wp.gov.lk என்ற இணையத்தளத்தின் ஊடான சேவையும் நவம்பர் 18ஆம் திகதி இரவு முதல் நவம்பர் 23ஆம் திகதி இரவு வரை இடைநிறுத்தப்படவுள்ளது.
தொழில்நுட்ப மேம்பாட்டுப் பணிகளை வெற்றிகரமாக நிறைவு செய்வதற்கு பொதுமக்களின் ஒத்துழைப்பை எதிர்பார்ப்பதாக மேல் மாகாண மோட்டார் போக்குவரத்துத் திணைக்களம் தெரிவித்துள்ளது.
இந்தத் தற்காலிக சேவை இடைநிறுத்தத்தினால் பொதுமக்களுக்கு ஏற்படும் அசௌகரியங்களுக்கு திணைக்களம் வருத்தம் தெரிவித்துள்ளது.







