அதிநவீன வாகனங்களில் பயணிக்கும் ஆசை துறந்த தேரர்கள்!

தன்னை அரஹந்தர் எனக் கூறும் சிறி சமந்தபத்ர தேரர், சுமார் 3 கோடியே 25 இலட்சம் ரூபாய் பெறுமதியானதாகக் கூறப்படும் சொகுசு வாகனத்தில் பயணிக்கும் காணொளி சமூக வலைத்தளங்களில் வெளியாகி சர்ச்சையை ஏற்படுத்தியுள்ளது.

கடந்த ஒக்டோபர் 21ஆம் திகதி வெளியான இந்தக் காணொளியைத் தொடர்ந்து, தேரரின் வாழ்க்கை முறை மற்றும் பௌத்த பிக்குகளின் ஒழுக்க நெறிகள் தொடர்பில் பல்வேறு கருத்துக்கள் முன்வைக்கப்பட்டு வருகின்றன.

குறித்த வாகனத்தில் நவீன வசதிகளுடன் கூடிய தோல் இருக்கைகள், LED விளக்குகள் உள்ளிட்ட பல்வேறு அம்சங்கள் காணப்படுகின்றன. நீண்ட தூரப் பயணங்களின்போது கால்களில் ஏற்படும் அசௌகரியத்தைக் குறைக்கும் நோக்கில் வாகனத்தின் இருக்கை வசதிகள் மாற்றியமைக்கப்பட்டுள்ளதாக தேரர் காணொளியில் குறிப்பிட்டுள்ளார்.

மேலும், இருக்கை வசதிகளை மேம்படுத்துவதற்காக மாத்திரம் 10 இலட்சம் ரூபாய்க்கும் அதிகமான தொகை செலவிடப்பட்டதாகவும் காணொளியில் தெரிவிக்கப்படுகிறது. இருப்பினும், வாகனத்தின் உரிமை மற்றும் அதன் பெறுமதி தொடர்பான தகவல்கள் உத்தியோகபூர்வமாக உறுதிப்படுத்தப்படவில்லை.

குருநாகல், மெல்சிறிபுர பகுதியில் அமைந்துள்ள ‘உமந்தாவ’ பௌத்த கிராமத்தை உருவாக்கிய சமந்தபத்ர தேரர், அங்கு அரிசி, வாசனைப் பொருட்கள் மற்றும் அழகுசாதனப் பொருட்கள் உள்ளிட்டவற்றை விற்பனை செய்யும் வர்த்தக நடவடிக்கைகளிலும் ஈடுபட்டு வருகின்றார்.

இதற்கு முன்னரும், 2019ஆம் ஆண்டு நடைபெற்ற அவரது பிறந்தநாள் நிகழ்வின்போது லூயி விட்டன் மற்றும் ஃபெண்டி போன்ற ஆடம்பர வர்த்தக நாமங்களைக் கொண்ட பொருட்கள் பரிசாக வழங்கப்பட்டமை தொடர்பில் சர்ச்சைகள் எழுந்திருந்தன.

இந்நிலையில், பௌத்த பிக்குகள் பின்பற்ற வேண்டிய ஒழுக்க நெறிகள், துறவற வாழ்க்கை மற்றும் ஆடம்பர வசதிகளைப் பயன்படுத்துவது தொடர்பான விவாதங்கள் மீண்டும் சமூக வலைத்தளங்களில் கவனம் பெற்றுள்ளன.

மேலும், கடந்த ஒக்டோபர் 22ஆம் திகதி சமந்தபத்ர தேரர் மல்வத்து மகா விகாரைக்கு அழைக்கப்பட்டு, ஊடகங்களில் தோன்றும் விதம் உள்ளிட்ட சில செயற்பாடுகள் தொடர்பில் அறிவுறுத்தப்பட்டதாகவும் செய்திகள் வெளியாகியுள்ளன.

சமந்தபத்ர தேரரின் ஆன்மிகக் கொள்கைகள் மற்றும் அவர் தொடர்பாக வெளியாகியுள்ள ஆடம்பர வாழ்க்கை முறை குறித்த தகவல்கள் தொடர்பில் சமூக வலைத்தளங்களில் பல்வேறு கருத்துக்கள் தொடர்ந்து பகிரப்பட்டு வருகின்றன.