வெள்ளம் மற்றும் அனர்த்தங்களால் பாதிக்கப்பட்ட அனைத்து விவசாயிகளுக்கும் இந்த மாத இறுதிக்குள் இழப்பீட்டுத் தொகையை முழுமையாக வழங்க அரசாங்கம் திட்டமிட்டுள்ளதாக விவசாய, கால்நடை வளங்கள் பிரதியமைச்சர் நாமல் கருணாரத்ன தெரிவித்துள்ளார்.
இந்த இழப்பீட்டுத் திட்டத்தின் கீழ், நெல், காய்கறிகள், கௌப்பி, பாசிப்பயறு, உளுந்து, சோளம், வாழை, மிளகாய், கிழக்கு மற்றும் வெங்காயம் உள்ளிட்ட அனைத்துப் பயிர்களும் அடங்குவதாகவும் அவர் குறிப்பிட்டுள்ளார்.
காய்கறிகளுக்கான இழப்பீட்டுத் தொகை ஒரு ஹெக்டேயருக்கு இரண்டு இலட்சம் ரூபா எனவும், மற்ற பயிர்களுக்கு ஒரு ஹெக்டேயருக்கு ஒன்றரை இலட்சம் ரூபா எனவும் நிர்ணயிக்கப்பட்டுள்ளது.
இதற்கான நிதி ஏற்கனவே அங்கீகரிக்கப்பட்டு விடுவிக்கப்பட்டு, உரிய மாவட்டங்களுக்கு அனுப்பப்பட்டுள்ளது.
மேலும், வெள்ளத்தால் மணல் அல்லது சேறு படிந்து, அல்லது மேற்பரப்பு மண் அரிக்கப்பட்டுச் சேதமடைந்த பயிரிடப்படாத வயல்களுக்கும் இழப்பீடு வழங்கப்படுகிறது.
இவ்வாறான நிலங்களில் இந்தப் பெரும்போக பருவத்தில் பயிரிட முடியாது. அவ்வாறான விவசாயிகளுக்கும் நஷ்டஈடு வழங்கப்படும்
அதேநேரம், கால்நடை வளர்ப்புச் சேதங்களுக்கும் இழப்பீடு வழங்கப்படுகிறது.
ஆடு, மாடு, பன்றி போன்ற விலங்குகளுக்குச் சேதம் ஏற்பட்ட விவசாயிகளுக்கும், கால்நடைப் பண்ணைகளுக்குச் சேதம் ஏற்பட்டால் ஒரு பண்ணைக்கு இரண்டு இலட்சம் ரூபாய் வீதமும் இழப்பீட்டுத் தொகையும் வழங்கப்படும் எனவும் அவர் குறிப்பிட்டார்.
சேதமடைந்த பண்ணைகளை குறிப்பாகக் கோழிப் பண்ணைகளை மீண்டும் தொடங்குவதற்காக, பாதிக்கப்பட்ட மக்களுக்குச் சலுகைக் கடன்களை வழங்கும் திட்டத்தையும் அரசு முன்மொழிந்துள்ளது.
இழப்பீடு வழங்குவதற்கு முன்னர், எவ்வளவு சேதம் ஏற்பட்டது போன்ற தரவுகளைத் திரட்டுவது அவசியமாகும் என்பதால், அதிகாரிகள் விடுமுறை நாட்களைக் கருதாமல் களத்தில் சென்று விவசாயிகளுடன் இணைந்து துரிதமாகத் தரவுகளைச் சேகரிக்கும் பணியில் ஈடுபட்டுள்ளனர்.
இந்தத் தரவுகளைத் திரட்டும்போது விவசாயிகளுக்கு அதிகபட்ச நன்மை கிடைக்கும் வகையில் தகவல்களைத் தொகுத்து வழங்க வேண்டும் என்று அதிகாரிகளுக்கு அறிவுறுத்தப்பட்டுள்ளது.
எதிர்காலத்தில் உணவுப் பற்றாக்குறை ஏற்படும் அபாயத்தைத் தவிர்ப்பதற்காக, பயிர் செய்யக்கூடிய அனைத்து நிலங்களிலும் கட்டாயமாகப் பயிர் செய்ய வேண்டும் என்று அரசாங்கம் அனைத்து விவசாயிகளிடமும் கோருவதாக பிரதியமைச்சர் நாமல் கருணாரத்ன தெரிவித்துள்ளார்.
