“நிலக்கரியை யாரும் சாப்பிட்டு வாங்குவதில்லை” என்ற ஜனாதிபதி; விமல் வீரவன்ச விசனம்

இலங்கையின் வரலாற்றில் மிக மோசமான மோசடியாகக் கருதப்படும் நிலக்கரி ஊழல், ஜனாதிபதி மற்றும் எரிசக்தி அமைச்சர் ஆகியோரால் செய்யப்பட்ட ஒரு “கலப்பின” அல்லது “இணைந்த” திருட்டு என்று தேசிய சுதந்திர முன்னணித் தலைவரும் முன்னாள் அமைச்சருமான விமல் வீரவன்ச நேற்று முன்தினம் (08) குற்றம் சாட்டினார்.

பத்தரமுல்லவில் உள்ள கட்சி அலுவலகத்தில் நடைபெற்ற ஊடக சந்திப்பில் உரையாற்றிய அவர்,
மோசடிக் குற்றச்சாட்டுக்கு உள்ளான ஒரு அமைச்சரைப் பாதுகாப்பதற்காக, வரலாற்றில் முதன்முறையாக ஒரு ஜனாதிபதி பாராளுமன்றத்தில் நேரடியாகத் தலையிடுவது ஒரு வெட்கக்கேடான முன்னுதாரணமாகும் என்று வலியுறுத்தினார்.

டெண்டர் நடைமுறை சரியானது என்று ஜனாதிபதி பாராளுமன்றத்தில் கூறியிருந்தபோதிலும், தாக்கல் செய்யப்பட்ட (07) சிறப்புத் தணிக்கை அறிக்கை அந்தக் கூற்றுகள் அனைத்தும் பொய்யானவை என்பதை நிரூபித்துள்ளது என்று வீரவன்ச சுட்டிக்காட்டினார்.

சம்பந்தப்பட்ட இந்திய நிறுவனத்தைத் தகுதிப்படுத்துவதற்காக, முந்தைய அனுபவத்தை ஒரு மில்லியன் மெட்ரிக் டன்களிலிருந்து இரண்டு இலட்சமாக வேண்டுமென்றே குறைத்ததிலும், மதிப்புக்கூட்டு வரி (VAT) பதிவு கூட இல்லாத ஒரு நிறுவனத்திற்கு டெண்டர் வழங்கியதிலும் பெரிய அளவிலான ஊழல் நடந்திருப்பதை தணிக்கைத் துறைகள் உறுதிப்படுத்தியுள்ளன.

நிலக்கரியின் தரம் குறித்து ஜனாதிபதி தெரிவித்த “நிலக்கரியை யாரும் சாப்பிட்டு வாங்குவதில்லை” என்ற கூற்றை வன்மையாக விமர்சித்த வீரவன்ச, தரத்தை அறிவியல் பூர்வமாகச் சரிபார்க்கும் ‘நடுவர் மாதிரி’ முறை இன்னும் நடைமுறைப்படுத்தப்படாததற்குப் பின்னால் ஒரு பெரிய இரகசியம் இருப்பதாக வெளிப்படுத்தினார்.

“ஒவ்வொரு கப்பலிலிருந்தும் எடுக்கப்படும் நடுவர் மாதிரியானது ஒரு சுதந்திரமான ஆய்வுக்கு உட்படுத்தப்பட்டால் மட்டுமே, விநியோகஸ்தருக்கு அபராதம் விதிக்கவோ அல்லது இழப்பீடு பெறவோ சட்டப்பூர்வ உரிமை உண்டு. ஆனால் இதுவரை, இந்த ஆய்வு ஒரு கப்பலில் கூட மேற்கொள்ளப்படவில்லை.
இது, தரகுக் குழுவின் நலனுக்காக இந்த மோசடியை மூடிமறைக்க அரசாங்கம் விரும்புவதைக் காட்டுகிறது,” என்று அவர் கூறினார்.

இதன் காரணமாக, எதிர்காலத்தில் அதிக செலவில் டீசலைப் பயன்படுத்தி மின்சாரம் உற்பத்தி செய்ய வேண்டியிருக்கும் என்றும், இதன் சுமை அதிக மின் கட்டணங்கள் வடிவில் மக்கள் மீது சுமத்தப்படும் என்றும் அவர் எச்சரித்தார்.

சிங்களப் புத்தாண்டுக்கு முந்தைய நாள் எரிவாயு விலையை 80% உயர்த்திய அரசாங்கத்தின் ‘இரக்கமற்ற’ செயலையும் அவர் சுட்டிக்காட்டினார்.

ஜேவிபி-யின் தலைமைக்கு சிறிதளவேனும் ‘அறிவு’ இருக்குமானால், ஊழல் நிறைந்த எரிசக்தி அமைச்சரை உடனடியாகப் பதவியிலிருந்து நீக்குமாறு விமல் வீரவன்ச சவால் விடுத்தார்.

இல்லையெனில், இந்த மாபெரும் திருட்டின் காரணமாக முழு கட்சியும் அரசியல் ரீதியாக ‘புதைக்கப்பட’ வேண்டியிருக்கும் என்றும் அவர் மேலும் வலியுறுத்தினார்.