மலையக மக்களின் காணி மற்றும் நில உரிமைகளைக் கோரி, 7 வயதுடைய உலக சாதனையாளரான மாணவர் பிரேம் கார்கி, தலவாக்கலையிலிருந்து கொழும்பு நோக்கிய தனது வரலாற்று முக்கியத்துவம் வாய்ந்த நீண்டதொரு நடைபயணத்தை இன்று (20) காலை ஆரம்பித்துள்ளார்.
மலையக மக்களின் நீண்டகால நில உரிமைகளை வென்றெடுப்பதையும், இவ்விடயம் குறித்துப் தற்போதைய அரசாங்கத்திற்கும் பொறுப்பு வாய்ந்த ஏனைய திணைக்களங்களுக்கும் வலுவாகத் தெளிவுபடுத்துவதையும் நோக்கமாகக் கொண்டே இந்த நடைபயணம் ஆரம்பிக்கப்பட்டுள்ளது. கொழும்பிலுள்ள ஜனாதிபதி செயலகத்திற்கும், ஐக்கிய நாடுகள் மனித உரிமைகள் பேரவையின் (UNHRC) இலங்கை அலுவலகத்திற்கும் தமது நியாயமான கோரிக்கைகள் அடங்கிய மகஜர்களைக் கையளிப்பதற்காகவே, தலவாக்கலை நகரத்திலிருந்து கொழும்பு வரையான சுமார் 140 கிலோமீற்றர் தூரத்தைக் கொண்ட இந்நெடும் பயணத்தைச் சிறுவன் பிரேம் கார்கி மேற்கொண்டுள்ளார்.
இன்று காலை தலவாக்கலை நகரத்திலிருந்து ஆரம்பமான இந்நாடாளுமன்ற நடைபயணம், கொட்டக்கலை நகரத்தை அடைந்த போது, அங்கு குழுமியிருந்த மருத்துவத்துறையினர், வர்த்தகப் பெருமக்கள் மற்றும் பொதுமக்கள் எனப் பலரும் அச்சிறுவனுக்குப் பொன்னாடை போர்த்தி, மலர்மாலை அணிவித்து மிகவும் உற்சாகமான வரவேற்பளித்தனர்.
இவ்வீரமிக்க உரிமை நடைப்பயணமானது, சரியாக 7 நாட்களுக்குள் கொழும்புத் தலைநகரைச் சென்றடையும் வகையில் மிகத் துல்லியமாகத் திட்டமிடப்பட்டுள்ளமை குறிப்பிடத்தக்கது.
