மேல் மாகாணத்தின் சீதுவை மற்றும் கிரேன்ட்பாஸ் பொலிஸ் பிரிவுகளுக்குட்பட்ட பகுதிகளில் அடுத்தடுத்து இரு வேறு மனிதக் கொலைச் சம்பவங்கள் பதிவாகியுள்ளதாகப் பொலிஸ் தலைமையகம் உத்தியோகபூர்வமாகத் தெரிவித்துள்ளது.
சீதுவை பொலிஸ் பிரிவுக்குட்பட்ட முகலங்கமுவ பகுதியில் அமைந்துள்ள வீடு ஒன்றில் இருந்து கடுமையான துர்நாற்றம் வீசுவதாகச் சீதுவை பொலிஸ் நிலையத்திற்குப் பொதுமக்களால் தகவல் வழங்கப்பட்டுள்ளது.
அதனடிப்படையில் அங்கு விரைந்த பொலிஸார், குறிப்பிட்ட வீட்டை அதிரடியாகச் சோதனையிட்ட போது, அதன் படுக்கையறை ஒன்றில் வைக்கப்பட்டிருந்த பெரிய பயணப் பையொன்றுக்குள் (Travel Bag) பெண் ஒருவரின் சடலம் மறைத்து வைக்கப்பட்டிருந்தமை கண்டறியப்பட்டுள்ளது.
இவ்வாறு படுகொலை செய்யப்பட்டவர் சீதுவை, முகலங்கமுவ பகுதியைச் சேர்ந்த 79 வயதுடைய வயோதிபப் பெண் என அடையாளம் காணப்பட்டுள்ளார்.
உயிரிழந்த பெண் அந்த வீட்டில் நீண்டகாலமாகத் தனியாக வசித்து வந்துள்ளார். திட்டமிட்டுக் கொள்ளையடிக்கும் நோக்கில் இக்கொலைச் சம்பவம் அரங்கேற்றப்பட்டிருக்கலாம் எனப் பொலிஸார் சந்தேகிக்கின்றனர்.
கொலையாளிகள் தங்களை அடையாளம் காண்பதைத் தவிர்ப்பதற்காக வீட்டில் பொருத்தப்பட்டிருந்த சிசிடிவி (CCTV) பாதுகாப்பு கேமராக்களைக் கழற்றி அகற்றியுள்ளதுடன், தொலைபேசி இணைப்புகளுக்கான வயர்களையும் துண்டித்துள்ளமை ஆரம்பக்கட்ட விசாரணைகளில் அம்பலமாகியுள்ளது. இக்கொலைச் சம்பவம் தொடர்பிலான மரண விசாரணை மற்றும் பிரேத பரிசோதனைகள் இன்று (21) நடத்தப்படவுள்ளதுடன், சந்தேகநபர்களைக் கைது செய்வதற்காகச் சீதுவை பொலிஸார் பல கோணங்களில் மேலதிக புலனாய்வு விசாரணைகளை தொடர்கின்றனர்.
இதேவேளை, கிரேன்ட்பாஸ் பொலிஸ் பிரிவுக்குட்பட்ட ஃபர்கியுசன் வீதி (Ferguson Road) பகுதியில், நபர் ஒருவர் கூர்மையான ஆயுதங்களால் மிகக் கொடூரமான முறையில் தாக்கப்பட்டுப் படுகொலை செய்யப்பட்டுள்ளதாகக் கிரேன்ட்பாஸ் பொலிஸாருக்கு அவசரத் தகவல் கிடைத்துள்ளது.
இவ்வாறு உயிரிழந்தவர் முகத்துவாரம் ‘உயன’ அடுக்குமாடிக் குடியிருப்புப் பகுதியைச் சேர்ந்த 31 வயதுடைய இளைஞர் எனப் பொலிஸார் உறுதிப்படுத்தியுள்ளனர். தனிப்பட்ட பழிவாங்கல் அல்லது பாதாள உலகக் குழுக்களின் மோதலின் பின்னணியில் இக்கொலை நடந்திருக்கலாம் எனச் சந்தேகிக்கப்படும் நிலையில், தப்பியோடியுள்ள கொலையாளிகளை உடனடியாகக் கைது செய்வதற்காகக் கிரேன்ட்பாஸ் பொலிஸார் விசேட சோதனைகளை ஆரம்பித்துள்ளனர்.
