எதிர்வரும் ஜனவரி மாதத்தில் இருந்து அரச ஊழியர்களுக்கான புதிய சம்பள உயர்வு முறைப்படி வழங்கப்படும் என ஜனாதிபதி அநுர குமார திசாநாயக்க திட்டவட்டமாகத் தெரிவித்துள்ளார்.
மட்டக்களப்பில் நேற்று (20) நடைபெற்ற விசேட மக்கள் சந்திப்பில் கலந்துகொண்டு உரையாற்றும் போதே அவர் இந்த முக்கிய அறிவிப்பை உத்தியோகபூர்வமாக வெளியிட்டார்.
அங்கு அவர் மேலும் குறிப்பிடுகையில், அரச சேவையின் சம்பள உயர்வுகளானது மூன்று கட்டங்களின் கீழ் (Three Stages) நடைமுறைப்படுத்துவதற்குக் திட்டமிடப்பட்டுள்ளதாகக் குறிப்பிட்ட ஜனாதிபதி, அரச சேவையில் இன்னும் தீர்க்கப்பட வேண்டிய பெரிய பிரச்சினைகள் பல உள்ளதாகவும் அவற்றை ஒவ்வொன்றாகத் தீர்ப்பதற்கு அரசாங்கம் தயாராக உள்ளதாகவும் சுட்டிக்காட்டினார்.
அக்கூட்டத்தில் ஜனாதிபதி மேலும் கருத்து வெளியிடுகையில்,
“நாட்டை முன்னோக்கி நகர்த்துவதற்கு எமக்கு ஒரு வலுவான, வினைத்திறனான அரச சேவை (Strong Public Service) தேவைப்படுகிறது. எமது காவல்துறையினர், முப்படைகள் மற்றும் அரசாங்க அதிபர்கள் (GA) முதல் அடிமட்ட ஊழியர்கள் வரை உள்ளடங்கிய ஒரு பலமிக்க அரச சேவையே எமது இலக்காகும்.
நாங்கள் தற்போது அதற்காகவே அர்ப்பணிப்புடன் உழைத்து வருகிறோம். அரச சேவையில் நீண்டகாலமாக நிலவி வரும் உத்தியோகபூர்வ வெற்றிடங்களை விரைவாக நிரப்புவதற்கு நடவடிக்கை எடுத்து வருவதுடன், அதற்கான முறையான, வெளிப்படைத்தன்மை கொண்ட புதிய ஆட்சேர்ப்புத் (Recruitment) திட்டங்களையும் நாங்கள் ஏற்கனவே மேற்கொண்டு வருகிறோம்” என ஜனாதிபதி அநுர குமார திசாநாயக்க தெரிவித்தார்.
