சாமரசம்பத் தசநாயக்க தெரிவித்ததாவது, நாட்டின் பொருளாதார நிலைமை தொடர்ந்து மோசமடைந்து வருவதாகவும், டொலரின் பெறுமதி அதிகரிப்பை தற்போதைய அரசாங்கத்தால் கட்டுப்படுத்த முடியாத நிலை ஏற்பட்டுள்ளதாகவும் கூறினார்.
கூட்டு எதிர்க்கட்சியினர் “பொய்யையும் திருட்டையும் ஒன்றாக தோற்கடிப்போம்” என்ற தொனிப்பொருளில் நேற்று (24) கம்பஹா – ஜா எல பகுதியில் நடத்திய மாநாட்டில் கலந்து கொண்டு உரையாற்றியபோது அவர் இந்தக் கருத்துகளை வெளியிட்டார்.
தான் கடந்த பெப்ரவரி மாதத்திலேயே டொலரின் பெறுமதி அதிகரிக்கும் என்றும், மார்ச் மாதத்தில் எரிவாயு தட்டுப்பாடு உருவாகும் என்றும் எச்சரித்திருந்ததாக அவர் குறிப்பிட்டார். தற்போதைய விலை உயர்வுகள் காரணமாக டொலரின் பெறுமதி மேலும் உயரக்கூடும் என்றும் தெரிவித்தார்.
மேலும், அரசாங்கம் ஊழல் மற்றும் மோசடிகளை ஒழிப்பதாக வாக்குறுதி அளித்திருந்தபோதிலும், வாகன வரி அதிகரிப்பைச் சுற்றியுள்ள நடவடிக்கைகளில் முறைகேடுகள் இடம்பெற்றுள்ளதாக அவர் குற்றஞ்சாட்டினார். வரி உயர்வு அறிவிக்கப்படுவதற்கு முன்பே சிலருக்கு தகவல்கள் வழங்கப்பட்டதாகவும், அதன் மூலம் ஆயிரக்கணக்கான வாகனங்களுக்கான வங்கி கடன் நடவடிக்கைகள் முன்னெடுக்கப்பட்டதாகவும் கூறினார்.
அதேபோல், நாட்டிற்கு கிடைக்க வேண்டிய வருவாயில் இழப்புகள் ஏற்படுகின்றன என்றும், இதனால் பொருளாதார சிக்கல்கள் மேலும் தீவிரமடையலாம் என்றும் அவர் எச்சரித்தார்.
மேலும், நாட்டின் பொருளாதார நெருக்கடியான காலத்தில், கட்சி வேறுபாடுகளை தாண்டி ரணில் விக்ரமசிங்கவை ஜனாதிபதியாக ஆதரித்து நாட்டை மீட்டெடுக்க முயற்சி செய்ததாகவும், அதற்காக பல அரசியல் தலைவர்கள் மக்கள் ஆதரவை இழந்ததாகவும் அவர் குறிப்பிட்டார்.
