சர்வதேச ரோட்டரி கழகத்தின் உலகளாவிய தாரக மந்திரமான “தன்னலமற்ற சேவை” (Service Above Self) என்பதற்கிணங்க, மட்டக்களப்பு மாவட்ட இளைஞர் வலுவூட்டல் மற்றும் சமூக முன்னேற்றத்தை முதன்மையாக நோக்காகக் கொண்டு, ‘ரோட்டரி கிளப் ஒஃப் மட்டக்களப்பு ஹெரிடேஜ்’ (Rotary Club of Batticaloa Heritage) அமைப்பினால் மாணவர்களுக்கான விசேட உளநல மேம்பாட்டு நிகழ்ச்சித் திட்டமொன்று வெற்றிகரமாக நடத்தப்பட்டுள்ளது.
“மாணவர்களை உளவளத்தின் மூலம் வலுப்படுத்துதல்” என்ற தொனிப்பொருளிலான இந்த இரு நாள் விழிப்புணர்வு மற்றும் ஆளுமைப் பயிற்சிப் பட்டறை, கடந்த மே மாதம் 23 மற்றும் 24 ஆம் திகதிகளில் மட்டக்களப்பு – களுவங்கேணி விவேகானந்தா மகா வித்தியாலயத்தில் மிகச் சிறப்பான முறையில் நடைபெற்றது.
இன்றைய போட்டித்தன்மை வாய்ந்த கல்விச் சூழலில், மாணவர்களின் உணர்ச்சி நிலைத்தன்மை (Emotional Stability), சுய தன்னம்பிக்கை மற்றும் நேர்மறை மனநலத்தை (Positive Mental Health) மேம்படுத்துவதை முதன்மையாகக் கொண்டு இவ்வமர்வுகள் விசேடமாக வடிவமைக்கப்பட்டிருந்தன.
வெறும் தத்துவார்த்த விரிவுரைகளாக மாத்திரம் அமையாமல், மாணவர்களைத் துடிப்புடன் பங்கேற்கச் செய்யும் வகையிலான ஆக்கப்பூர்வமான குழுச் செயற்பாடுகள் (Group Activities), உளவியல் சார்ந்த கலந்துரையாடல்கள் மற்றும் வாழ்வியல் விழிப்புணர்வு அமர்வுகள் இதில் இடம்பெற்றமை தனித்துவமான அம்சமாகும்.
பிரபல கல்வியாளர்கள் மற்றும் முன்னணி மனநல நிபுணர்கள் பலரால் இந்த அமர்வுகள் மாணவர்களுக்குப் புரியும் வகையில் மிகவும் காத்திரமான முறையில் வழிநடத்தப்பட்டன. இதன் நிறைவில், குறித்த இரண்டு நாள் செயலமர்வில் கலந்துகொண்டு பயிற்சிகளை வெற்றிகரமாக நிறைவு செய்த மாணவர்கள் அனைவருக்கும் உத்தியோகபூர்வ பாராட்டுச் சான்றிதழ்கள் வழங்கி வைக்கப்பட்டன.
கல்வி, சுகாதாரம் மற்றும் மனிதநேய சேவைகள் உள்ளிட்ட பல்வேறு சமூக நலன்புரித் துறைகளில் தங்களது அர்த்தமுள்ள பங்களிப்புகளைத் தொடர்ச்சியாக வழங்கிவரும் ‘ரோட்டரி கிளப் ஒஃப் மட்டக்களப்பு ஹெரிடேஜ்’ அமைப்பானது, இத்திட்டத்தின் மூலம் மட்டக்களப்பு மாவட்ட மாணவர் சமூகத்தின் எதிர்கால ஆளுமை முன்னேற்றத்திற்கான தங்களின் அர்ப்பணிப்பை மீண்டும் ஒருமுறை நிரூபித்துள்ளதாகப் பிரதேசக் கல்வியாளர்கள் பாராட்டு தெரிவித்துள்ளனர்.
