பெண் சடலமாக மீட்பு; சந்தேக நபரை கண்டறிய பொதுமக்களின் உதவியை நாடும் பொலிஸார்

நுவரெலியா நகரில் உள்ள தனியார் விடுதியொன்றில் தங்கியிருந்த நிலையில், கண்டி தெல்தெனிய வைத்தியசாலைக்கு அருகில் காணப்பட்ட காரிலிருந்து சடலமாக கண்டுபிடிக்கப்பட்ட 33 வயதுடைய பெண், அம்பாறை வைத்தியசாலையில் உடற்பயிற்சி நிபுணராக பணியாற்றி வந்தவர் என்பது விசாரணைகளில் தெரியவந்துள்ளது.

சம்பவத்துடன் தொடர்புடைய சந்தேக நபர் தொடர்பான சிசிடிவி காட்சிகள் மற்றும் புகைப்படங்களை நுவரெலியா பொலிஸார் வெளியிட்டு, அவரை அடையாளம் காண பொதுமக்களிடம் உதவி கோரியுள்ளனர்.

நேற்று (17) மாலை, குறித்த பெண் கண்டி தெல்தெனிய வைத்தியசாலைக்கு அருகில் நிறுத்தப்பட்டிருந்த காரிலிருந்து சடலமாக கண்டுபிடிக்கப்பட்டதாக பொலிஸார் தெரிவித்தனர்.

முதற்கட்ட விசாரணைகளில், குறித்த பெண் நுவரெலியாவில் உள்ள தனியார் சுற்றுலா விடுதியில் பல நாட்கள் தங்கியிருந்ததும் தெரியவந்துள்ளது.

அவருடன் விடுதியில் தங்கியிருந்த நபரே இந்த மரணத்துடன் தொடர்புடையவர் என பொலிஸார் சந்தேகிக்கின்றனர்.

விசாரணை தகவல்களின்படி, சந்தேக நபர் கடந்த சில தினங்களில் குறித்த பெண்ணுடன் விடுதிக்கு சென்று பின்னர் வெளியேறியுள்ளதாக தெரிவிக்கப்படுகிறது. பின்னர் மீண்டும் பெண் தனியாக விடுதிக்கு திரும்பியுள்ளார்.

இதனைத் தொடர்ந்து, சம்பவ நாளில் இரவு சந்தேக நபர் வாடகைக் காரில் விடுதிக்கு சென்று, தனது மனைவிக்கு உடல்நிலை சரியில்லை என தெரிவித்து, பெண்ணை அழைத்துச் சென்றதாக கூறப்படுகிறது.

விடுதியில் இருந்து புறப்படும் முன் கட்டணம் செலுத்தப்பட்டதாகவும் தெரிவிக்கப்பட்டுள்ளது.

பின்னர் விடுதி பாதுகாப்பு அதிகாரி அளித்த தகவலின் அடிப்படையில் பொலிஸார் விசாரணையை ஆரம்பித்துள்ளனர்.

உயிரிழந்த பெண் வெலிகம பகுதியைச் சேர்ந்தவர் என்றும், 2023 முதல் அம்பாறை வைத்தியசாலையில் பணியாற்றி வந்ததாகவும் பொலிஸார் தெரிவித்துள்ளனர்.

அவர் வெளிநாடு செல்லவுள்ளதாகக் கூறி தனது பணியை ராஜினாமா செய்யும் ஆவணங்களையும் சமர்ப்பித்திருந்ததாகவும் தெரிவிக்கப்பட்டுள்ளது.

சந்தேக நபர் கன்னொருவ பகுதியைச் சேர்ந்த 35 வயதுடையவர் என அடையாளம் காணப்பட்டுள்ளார். காதலர்களிடையே ஏற்பட்ட வாக்குவாதத்துக்குப் பிறகு இந்த கொலை இடம்பெற்றிருக்கலாம் என பொலிஸார் சந்தேகிக்கின்றனர்.

சந்தேக நபர் பெண்ணை தூக்கிச் செல்லும் சிசிடிவி காட்சிகள் விடுதியில் பதிவாகியுள்ளன.

எனினும் இதுவரை அவர் கைது செய்யப்படவில்லை என்றும், விசாரணைகள் தீவிரப்படுத்தப்பட்டுள்ளதாகவும் நுவரெலியா பொலிஸார் தெரிவித்துள்ளனர்.

சந்தேக நபர் தொடர்பான தகவல்களை வழங்குமாறு பொலிஸார் பொதுமக்களிடம் கோரியுள்ளனர்.

தொடர்பு இலக்கங்கள்:
071-8591096 – உதவி பொலிஸ் கண்காணிப்பாளர், நுவரெலியா
071-8591097 – தலைமையக பொலிஸ் பிரதம ஆய்வாளர், நுவரெலியா