சவுதி எண்ணெய்க் குழாய் மூடப்பட்டதைத் தொடர்ந்து கச்சா எண்ணெய் விலை உயர்வு!

ஹார்முஸ் நீரிணையைத் தவிர்த்து எண்ணெயை ஏற்றுமதி செய்வதற்கான முக்கிய குழாய் வழித்தடத்தை சவுதி அரேபியா தற்காலிகமாக மூடியுள்ள நிலையில், சர்வதேச சந்தையில் மசகு எண்ணெய் விலைகள் மீண்டும் அதிகரித்துள்ளன.

கிழக்கு நேரப்படி ஞாயிற்றுக்கிழமை மாலை 6.27 மணியளவில், அமெரிக்காவின் வெஸ்ட் டெக்சாஸ் இன்டர்மீடியட் (WTI) மசகு எண்ணெய் எதிர்கால ஒப்பந்தங்களின் விலை 2.8 சதவீதம் அதிகரித்து, ஒரு பீப்பாய்க்கு 102.87 அமெரிக்க டொலராக வர்த்தகமானது.

அதேவேளை, சர்வதேச சந்தையின் முக்கிய குறியீடான பிரெண்ட் மசகு எண்ணெயின் விலை 3.1 சதவீதம் உயர்ந்து, ஒரு பீப்பாய்க்கு 107.87 டொலராக பதிவாகியுள்ளது.

ஈராக்கிலிருந்து ஏவப்பட்டதாகக் கூறப்படும் ட்ரோன் தாக்குதல்களில் சவுதி அரேபியாவின் கிழக்கு–மேற்கு எண்ணெய்க் குழாய் சேதமடைந்ததைத் தொடர்ந்து, அந்த முக்கிய போக்குவரத்து வழித்தடத்தை மூட வேண்டிய நிலை ஏற்பட்டதாக தெரிவிக்கப்படுகிறது. எனினும், குழாய்க்கு ஏற்பட்ட சேதத்தின் அளவு அல்லது அது எவ்வளவு காலம் மூடப்பட்டிருக்கும் என்பது தொடர்பில் சவுதி அதிகாரிகள் இதுவரை தெளிவான தகவல்களை வெளியிடவில்லை.

இதனிடையே, ஹார்முஸ் நீரிணை பகுதியில் மற்றொரு எண்ணெய்க் கப்பல் தாக்குதலுக்கு உள்ளாகி தீப்பற்றியுள்ளதாக பிரித்தானிய கடல்சார் வர்த்தக நடவடிக்கை மையம் (UKMTO) தெரிவித்துள்ளது. இதனால் உலகின் முக்கிய எண்ணெய் போக்குவரத்து பாதைகளில் பாதுகாப்பு தொடர்பான அச்சம் மேலும் அதிகரித்துள்ளது.

தினசரி சுமார் 7 மில்லியன் பீப்பாய் எண்ணெயை கொண்டு செல்லக்கூடிய திறன் கொண்ட சவுதி அரேபியாவின் கிழக்கு–மேற்கு குழாய் வழித்தடம், பாரசீக வளைகுடாவை அண்மித்த எண்ணெய் உற்பத்திப் பகுதிகளை செங்கடல் கரையோர ஏற்றுமதி முனையங்களுடன் இணைக்கிறது.

ஹார்முஸ் நீரிணை வழியாக எண்ணெய் ஏற்றுமதிக்கு இடையூறு ஏற்படும் சூழலில், இந்த குழாய் வழித்தடம் சவுதி அரேபியாவுக்கு மாற்று ஏற்றுமதி பாதையாக முக்கியத்துவம் பெற்றுள்ளது.

இந்நிலையில், மத்திய கிழக்கில் அதிகரித்து வரும் மோதல் நிலைமை எண்ணெய் சந்தையில் விநியோகப் பற்றாக்குறை குறித்த கவலையை தீவிரப்படுத்தியுள்ளது. குறிப்பாக ஹார்முஸ் மற்றும் பாப்-எல்-மண்டேப் போன்ற முக்கிய கடல்வழிப் பாதைகளில் பாதுகாப்பு அச்சுறுத்தல்கள் நீடிப்பது, உலகளாவிய எரிசக்தி சந்தையில் தாக்கத்தை ஏற்படுத்தக்கூடும் எனக் கருதப்படுகிறது.

மேலும், சவுதி அரேபியாவுக்கு எதிராக ஈரான் ஆதரவு குழுக்களால் நடத்தப்படும் தாக்குதல்கள் அதிகரித்துள்ளதாகவும் தகவல்கள் வெளியாகியுள்ளன. ஏமனில் உள்ள ஹவுத்தி அமைப்பு சவுதி அரேபியாவின் எரிசக்தி நிலையங்கள் மற்றும் பிற இலக்குகள் மீது அண்மையில் தாக்குதல்களை நடத்தியதாக சவுதி அரசு ஊடகங்கள் தெரிவித்துள்ளன.

அத்துடன், பாப்-எல்-மண்டேப் நீரிணைக்கு அருகிலுள்ள பகுதிகளில் ஹவுத்திகளின் கட்டுப்பாடு அதிகரித்துள்ளதாக வெளியாகும் தகவல்கள், செங்கடல் வழியாக நடைபெறும் எண்ணெய் மற்றும் வர்த்தகக் கப்பல் போக்குவரத்து தொடர்பான அச்சத்தையும் மேலும் அதிகரித்துள்ளன.

மத்திய கிழக்கில் நிலவும் மோதல் மற்றும் முக்கிய எண்ணெய் போக்குவரத்து வழித்தடங்களில் ஏற்பட்டுள்ள பாதிப்புகள் தொடருமானால், எதிர்வரும் நாட்களில் சர்வதேச எண்ணெய் விலையில் மேலும் ஏற்ற இறக்கங்கள் ஏற்படக்கூடும் என சந்தை அவதானிப்பாளர்கள் கருதுகின்றனர்.