நிலவும் மோசமான வானிலை காரணமாக, நுவரெலியா மற்றும் ஹட்டன் கல்வி வலயங்களுக்கு உட்பட்ட சிங்கள மற்றும் தமிழ் மொழி மூலப் பாடசாலைகள் 13க்கு இன்று (21) விடுமுறை அளிக்கப்பட்டுள்ளது.
அந்தந்த வலயக் கல்வி அலுவலகப் பணிப்பாளர்களின் தகவலின்படி, நுவரெலியா கல்வி வலயத்திலுள்ள 156 பாடசாலைகளில் நான்கும், ஹட்டன் கல்வி வலயத்திலுள்ள 150 பாடசாலைகளில் ஒன்பதும் இன்று மூடப்பட்டுள்ளன.
நிலவும் மோசமான வானிலைச் சூழலில், பாடசாலைகளை நடத்துவதா இல்லையா என்பது குறித்த முடிவை எடுக்கும் அதிகாரம், வலயக் கல்விப் பணிப்பாளர்களால் அந்தந்தப் பாடசாலை அதிபர்களுக்கு வழங்கப்பட்டிருந்தது. அதற்கிணங்க, குறித்த 13 பாடசாலைகளையும் மூடுவதற்கான முடிவு அதிபர்களால் எடுக்கப்பட்டது.
அதேவேளை, நுவரெலியா மற்றும் ஹட்டன் கல்வி வலயங்களிலுள்ள ஏனைய பாடசாலைகளில் கல்வி நடவடிக்கைகள் வழமைபோல நடைபெற்று வருவதாக வலயக் கல்வி அலுவலகப் பணிப்பாளர்கள் மேலும் தெரிவித்தனர்.
