முன்னாள் ஜனாதிபதி மைத்திரிபால சிறிசேனவினால் 2019ஆம் ஆண்டு வழங்கப்பட்ட ஜனாதிபதி பொதுமன்னிப்பு செல்லுபடியாகாது என உச்ச நீதிமன்றம் தீர்ப்பளித்துள்ள நிலையில், தமக்குப் புதிய ஜனாதிபதி பொதுமன்னிப்பை வழங்குமாறு தற்போதைய ஜனாதிபதி அநுர குமார திசாநாயக்கவிடம் கோரிக்கை விடுக்குமாறு பொதுபல சேனா அமைப்பின் பொதுச் செயலாளர் கலகொட அத்தே ஞானசார தேரர், மூத்த பௌத்த பிக்குகளிடம் வேண்டுகோள் விடுத்துள்ளார்.
கொழும்பில் உள்ள சம்புத்தத்வ ஜயந்தி மந்திரயாவில் கடந்த 20ஆம் திகதி நடைபெற்ற தனது ‘நவயா பஹ விகுர்திய’ என்ற நூல் வெளியீட்டு நிகழ்வில் உரையாற்றியபோதே அவர் இந்தக் கோரிக்கையை முன்வைத்துள்ளார்.
தனது எதிர்காலம் தொடர்பில் தற்போது நிச்சயமற்ற நிலை ஏற்பட்டுள்ளதாகக் குறிப்பிட்ட ஞானசார தேரர், அதேவேளை நாட்டின் சட்டத்தை மதிக்கத் தயாராக இருப்பதாகவும் தெரிவித்துள்ளார். உச்ச நீதிமன்றத் தீர்ப்பைத் தொடர்ந்து தாம் அச்சமடையவில்லை எனவும், முன்னாள் ஜனாதிபதியினால் பொதுமன்னிப்பு வழங்கிய நடைமுறையில் அதிகாரிகள் தவறு செய்திருந்தால், அதற்கான விளைவுகளைத் தாம் ஏன் எதிர்கொள்ள வேண்டும் எனவும் கேள்வி எழுப்பியுள்ளார். தற்போதைய ஜனாதிபதியால் அந்தத் தவறுகளைத் திருத்த முடியும் எனவும் அவர் கருத்துத் தெரிவித்தார்.
தமது மத நடவடிக்கைகளைத் தொடர்வதற்குச் சந்தர்ப்பம் வழங்கப்பட வேண்டும் எனக் குறிப்பிட்ட அவர், தமக்காக ஜனாதிபதி பொதுமன்னிப்பை கோரி மூத்த பௌத்த பிக்குகள் தலையிட வேண்டும் எனக் கேட்டுக்கொண்டார். தமது 87 வயதுடைய தாயார் குறித்தும் உணர்வுபூர்வமாகப் பேசிய அவர், சிறையில் அடைக்கப்பட்டால் அவரை மீண்டும் சந்திக்கும் வாய்ப்பு கிடைக்காமல் போகலாம் என்ற கவலையையும் வெளியிட்டார்.
தமக்கு எதிரான சட்ட நடவடிக்கைகள் தற்போதைய அரசாங்கத்தின் காலத்தில் அல்ல, முன்னாள் நல்லாட்சி அரசாங்கத்தின் காலத்திலேயே ஆரம்பிக்கப்பட்டதாக அவர் சுட்டிக்காட்டினார். பல ஆண்டுகளாகத் தமக்கு ஆதரவளித்த அனைவருக்கும் நன்றி தெரிவித்த அவர், தம்மால் ஏதேனும் தவறுகள் இடம்பெற்றிருந்தால் அதற்காக மன்னிப்பும் கோரியுள்ளார்.
உச்ச நீதிமன்றத் தீர்ப்பு: 2019ஆம் ஆண்டு முன்னாள் ஜனாதிபதி மைத்திரிபால சிறிசேனவினால் ஞானசார தேரருக்கு வழங்கப்பட்ட ஜனாதிபதி பொதுமன்னிப்பு சட்டரீதியாக செல்லுபடியாகாது என உச்ச நீதிமன்றம் கடந்த செப்டெம்பர் 10ஆம் திகதி தீர்ப்பளித்தது. நீதிமன்ற அவமதிப்பு குற்றச்சாட்டில் அவருக்கு ஆறு ஆண்டுகள் சிறைத்தண்டனை விதிக்கப்பட்டிருந்த நிலையில், 2019ஆம் ஆண்டு பொதுமன்னிப்பு வழங்கப்பட்டதைத் தொடர்ந்து அவர் சிறையிலிருந்து விடுவிக்கப்பட்டிருந்தார். முன்னாள் ஜனாதிபதி பொதுமன்னிப்பு வழங்கிய நடைமுறை தன்னிச்சையானதாகவும், சட்டரீதியாக செல்லுபடியாகாததாகவும் உச்ச நீதிமன்றம் தீர்மானித்துள்ளது.
இதன் பின்னர், ஞானசார தேரர் மீதமுள்ள சிறைத்தண்டனையை அனுபவிப்பது தொடர்பான சட்ட நடவடிக்கைகள் குறித்துக் கேள்விகள் எழுந்துள்ளன. இந்தப் பின்னணியிலேயே, புதிய ஜனாதிபதி பொதுமன்னிப்பைக் கோரும் ஞானசார தேரரின் வேண்டுகோள் தற்போது அரசியல் மற்றும் சட்ட வட்டாரங்களில் கவனம் பெற்றுள்ளது.
