2019ஆம் ஆண்டு ஈஸ்டர் ஞாயிறு தினத்தில் இலங்கையில் இடம்பெற்ற தொடர் குண்டுவெடிப்புகள் தொடர்பான வழக்கில் குற்றவாளிகளாகத் தீர்ப்பளிக்கப்பட்ட 15 பேருக்கு கொழும்பு நிரந்தர மேல் நீதிமன்றம் நீண்டகால சிறைத்தண்டனைகளை விதித்துள்ளது.
மூன்று தேவாலயங்கள் மற்றும் மூன்று நட்சத்திர ஹோட்டல்களை இலக்காகக் கொண்டு நடத்தப்பட்ட இந்தத் தாக்குதல்களில் 270க்கும் மேற்பட்டோர் உயிரிழந்ததுடன், 500க்கும் அதிகமானோர் காயமடைந்தனர். உயிரிழந்தவர்களில் 45 வெளிநாட்டினரும் அடங்கியிருந்தனர்.
தற்கொலைத் தாக்குதல்களின் திட்டமிடலில் முக்கிய பங்கு வகித்ததாக அரசுத் தரப்பால் குறிப்பிடப்பட்ட நௌஃபர் மௌலவியும் குற்றவாளிகளாகத் தீர்ப்பளிக்கப்பட்டவர்களில் ஒருவராவார்.
வழக்கில் குற்றம் சாட்டப்பட்டிருந்த ஏனைய ஒன்பது பேரை நீதிமன்றம் விடுதலை செய்துள்ளது. குற்றம் சாட்டப்பட்ட 25 பேரில் ஒருவர் காவலில் இருந்தபோது உயிரிழந்திருந்தார்.
செவ்வாய்க்கிழமை வழங்கப்பட்ட தீர்ப்பில், குற்றவாளிகளாகக் கண்டறியப்பட்ட 15 பேருக்கும் தலா 200 முதல் 260 ஆண்டுகள் வரையிலான சிறைத்தண்டனைகள் விதிக்கப்பட்டுள்ளன. அவர்களுக்குச் சொந்தமான அசையும் மற்றும் அசையாச் சொத்துகளைப் பறிமுதல் செய்யவும் நீதிமன்றம் உத்தரவிட்டுள்ளது.
மூவரடங்கிய நீதியரசர்கள் குழாம் இந்தத் தீர்ப்பை வழங்கியது. 23,000க்கும் அதிகமான குற்றச்சாட்டுகளை எதிர்கொண்டிருந்த குற்றவாளிகள், பலத்த பாதுகாப்புக்கு மத்தியில் நீதிமன்றத்திற்கு அழைத்துவரப்பட்டனர்.
தாக்குதலுக்குப் பின்னரான உளவுத்துறை சர்ச்சை
ஈஸ்டர் தாக்குதல்களைத் தொடர்ந்து, தாக்குதல்கள் தொடர்பான முன் எச்சரிக்கைகள் மற்றும் உளவுத்தகவல்கள் உரிய முறையில் பகிரப்படாதது குறித்து பல்வேறு கேள்விகள் எழுந்தன.
இந்தியாவிலிருந்து கிடைத்த முக்கியமான உளவுத்தகவல்கள் இலங்கை அதிகாரிகளுடன் முறையாகப் பகிரப்படவில்லை என நாடாளுமன்றத்தில் முன்னதாக தெரிவிக்கப்பட்டிருந்தது.
2023ஆம் ஆண்டு, தாக்குதல்களுக்கு முன்னதாக ஏற்பட்ட தேசியப் பாதுகாப்பு தோல்விகளுக்கு முன்னாள் ஜனாதிபதி மைத்திரிபால சிறிசேன பொறுப்பானவர் என நீதிமன்றம் தீர்ப்பளித்ததுடன், பாதிக்கப்பட்டவர்களுக்கு இழப்பீடு வழங்கவும் உத்தரவிட்டிருந்தது.
மேலும், தாக்குதல்களுடன் தொடர்புடைய குற்றவியல் அலட்சியம் தொடர்பில் முன்னாள் பாதுகாப்பு உயர் அதிகாரிகளுக்கு எதிராகவும் சட்ட நடவடிக்கைகள் மேற்கொள்ளப்பட்டுள்ளன.
முன்னாள் உளவுத்துறைத் தலைவர் தொடர்பான விசாரணை
இந்நிலையில், முன்னாள் அரச புலனாய்வுச் சேவைத் தலைவர் சுரேஷ் சல்லே தொடர்பான தனியான விசாரணையும் இடம்பெற்று வருகிறது.
தாக்குதல்களைத் திட்டமிடுவதில் இஸ்லாமிய தீவிரவாதிகளுடன் அவர் தொடர்பு கொண்டிருந்ததாக குற்றச்சாட்டுகள் முன்வைக்கப்பட்டுள்ளன. எனினும், சல்லே தமக்கு எதிரான குற்றச்சாட்டுகளை மறுத்துள்ளார்.
2023ஆம் ஆண்டு வெளியான சேனல் 4 ஆவணப்படத்திலும் ஈஸ்டர் தாக்குதல்கள் மற்றும் அப்போதைய அரசியல் சூழல் தொடர்பாக பல்வேறு குற்றச்சாட்டுகள் முன்வைக்கப்பட்டிருந்தன. அந்தக் குற்றச்சாட்டுகளையும் முன்னாள் ஜனாதிபதி கோட்டாபய ராஜபக்ஷ உள்ளிட்டோர் மறுத்துள்ளனர்.
தாக்குதல்களுக்குப் பின்னர் இடம்பெற்ற அரசியல் மாற்றங்கள் மற்றும் தேசியப் பாதுகாப்பு தொடர்பான விடயங்கள் குறித்து தொடர்ந்து விசாரணைகள் இடம்பெற்று வரும் நிலையில், 15 பேருக்கு வழங்கப்பட்டுள்ள இந்தத் தீர்ப்பு ஈஸ்டர் தாக்குதல் வழக்கில் முக்கியமான நீதிமன்ற நடவடிக்கையாக அமைந்துள்ளது.
