பொதியிடப்படாத நிலையில் தேங்காய் எண்ணெய் விற்பனை செய்வதைத் தடை செய்வதற்கான நடவடிக்கைகள் முன்னெடுக்கப்பட்டு வருவதாக நுகர்வோர் விவகார அதிகாரசபை தெரிவித்துள்ளது.
பாராளுமன்ற பொது நிறுவனங்கள் பற்றிய குழுவின் (கோப் குழு) உப குழு முன்னிலையில் கருத்து தெரிவிக்கும்போதே, நுகர்வோர் விவகார அதிகாரசபையின் பதில் பணிப்பாளர் நாயகம் சமந்தா கருணாரத்ன இதனைத் தெரிவித்துள்ளார்.
தேங்காய் எண்ணெயில் தற்போது பல்வேறு பிரச்சினைகள் காணப்படுவதாகவும், இதனை கட்டுப்படுத்தும் வகையில் வர்த்தமானி அறிவித்தலொன்றை வெளியிடுவதற்கான நடவடிக்கைகள் மேற்கொள்ளப்பட்டுள்ளதாகவும் அவர் குறிப்பிட்டார்.
புதிய விதிமுறைகள் அமுலுக்கு வந்த பின்னர், தேங்காய் எண்ணெயை பொதியிட்டு மட்டுமே விற்பனை செய்ய அனுமதிக்கப்படும் என தெரிவிக்கப்பட்டுள்ளது.
திறந்த நிலையில் தேங்காய் எண்ணெய் விற்பனை செய்யப்படுவதால் கலப்படம் இடம்பெறுவதற்கான வாய்ப்புகள் அதிகமாக இருப்பதாக அதிகாரசபை சுட்டிக்காட்டியுள்ளது.
மேலும், பொதியிடப்பட்ட தேங்காய் எண்ணெயில் தயாரிப்பு மற்றும் உற்பத்தியாளர் தொடர்பான தகவல்களை தெளிவாக அடையாளம் காண முடியும் என தெரிவிக்கப்பட்டுள்ளது.
இதன்படி, தேங்காய் எண்ணெய் பொதிகளில் தயாரிப்பின் பெயர், எடை, விலை, காலாவதி திகதி, தொகுதி இலக்கம் மற்றும் உற்பத்தியாளர் தொடர்பான தகவல்கள் கட்டாயமாக குறிப்பிடப்படும் என அதிகாரசபை தெரிவித்துள்ளது.
