இலங்கையின் வருவாய் திரட்டலை தொடர்ச்சியாக வலுப்படுத்துவதுடன், வரி முறையின் செயல்திறன் மற்றும் நியாயத்தன்மையை மேம்படுத்தும் வகையில் இடைக்கால வருவாய் மூலோபாயம் ஒன்றை உருவாக்கி நடைமுறைப்படுத்துவது அவசியம் என சர்வதேச நாணய நிதியத்தின் (IMF) இலங்கைக்கான தூதுக்குழுத் தலைவர் எவான் பாபஜார்ஜியோ தெரிவித்துள்ளார்.
நாட்டின் பொருளாதார சீர்திருத்த நடவடிக்கைகளில் வரி அமைப்பை மேலும் திறம்பட மாற்றுவதற்கு முக்கியத்துவம் அளிக்கப்பட வேண்டும் என அவர் குறிப்பிட்டுள்ளார். அதேவேளை, சமூகத்தின் அனைத்து தரப்பினருக்கும் நியாயமான முறையில் வரிச்சுமை பகிரப்படுவதை உறுதி செய்வதும் அவசியம் என தெரிவித்துள்ளார்.
மேலும், வரி செலுத்துவோரின் எண்ணிக்கையை அதிகரித்து, வரி வலையமைப்பை விரிவுபடுத்துவதற்கான நடவடிக்கைகள் தீவிரப்படுத்தப்பட வேண்டும் எனவும் IMF தூதுக்குழுத் தலைவர் வலியுறுத்தியுள்ளார்.
அத்துடன், தற்போது நடைமுறையில் உள்ள வரி விலக்குகள் மற்றும் வரிச் சலுகைகளை மறுபரிசீலனை செய்து, தேவையற்ற சலுகைகளை நீக்குவதுடன், அவசியமான சலுகைகளை முறையான மற்றும் வெளிப்படையான அடிப்படையில் வழங்குவது முக்கியமானது என்றும் அவர் சுட்டிக்காட்டியுள்ளார்.
