மாற்றுத்திறனாளிகள் சாரதி அனுமதிப்பத்திரங்களைப் பெறுவதில் எதிர்கொள்ளும் சிரமங்களை குறைக்கும் வகையில், நடைமுறைகள் மற்றும் சட்டங்களில் மாற்றங்களை மேற்கொள்ள நாடாளுமன்ற விசேட குழு பரிந்துரைகளை முன்வைத்துள்ளது.
போக்குவரத்து, நெடுஞ்சாலைகள் மற்றும் நகர அபிவிருத்தி தொடர்பான அமைச்சரவை ஆலோசனைக் குழுவினால் நியமிக்கப்பட்ட இந்த விசேட குழுவின் ஆரம்பக் கூட்டம் அண்மையில் நாடாளுமன்றத்தில் நடைபெற்றது.
இதன்போது, பார்வை மற்றும் செவிப்புலன் குறைபாடுகளைக் கொண்ட நபர்களுக்கான சாரதி அனுமதிப்பத்திரத் தகுதிகளை விரிவுபடுத்துவது தொடர்பில் கவனம் செலுத்தப்பட்டது. மேலும், மாவட்ட மட்டத்தில் மருத்துவப் பரிசோதனைகளை நடத்துதல் மற்றும் மாற்றுத்திறனாளிகளின் தேவைகளுக்கு ஏற்ப வாகனங்களை மாற்றியமைப்பதற்கான தெளிவான வழிகாட்டுதல்களை அறிமுகப்படுத்துதல் குறித்தும் ஆலோசிக்கப்பட்டது.
தேசிய போக்குவரத்து மருத்துவ நிறுவனம் (NTMI) பின்பற்றும் நடைமுறைகள் மற்றும் இதனுடன் தொடர்புடைய வர்த்தமானி அறிவித்தல்களைத் திருத்துவது தொடர்பிலும் குழு கலந்துரையாடியுள்ளது.
குறிப்பாக, பார்வைப் புல மதிப்பீடுகளை அடிப்படையாகக் கொண்டு மருத்துவத் தகுதிகளை மறுபரிசீலனை செய்து, பார்வைச் சவால்கள் உள்ள நபர்கள் கூடுதல் வாகனப் பிரிவுகளைப் பயன்படுத்துவதற்கான வாய்ப்பை ஏற்படுத்துவது குறித்தும் முன்மொழிவுகள் முன்வைக்கப்பட்டுள்ளன.
அதேபோன்று, செவிப்புலன் குறைபாடுடைய சாரதிகளுக்கு சைகை மொழி மொழிபெயர்ப்பாளர் சேவையைப் பயன்படுத்துவதற்கான வசதி, சிறப்பு அடையாளக் குறியீடுகளை அறிமுகப்படுத்துதல் மற்றும் ஒரே சாரதி அனுமதிப்பத்திரத்தின் கீழ் பல மாற்றியமைக்கப்பட்ட வாகனங்களைப் பதிவு செய்வதற்கான ஏற்பாடுகளை உருவாக்குதல் ஆகியவையும் பரிசீலிக்கப்பட்டுள்ளன.
மேலும், நிர்வாகத் தடைகளை குறைக்கும் நோக்கில் தேசிய போக்குவரத்து மருத்துவ நிறுவனத்துக்கும் மோட்டார் போக்குவரத்துத் திணைக்களத்துக்கும் (DMT) இடையிலான டிஜிட்டல் ஒருங்கிணைப்பு முறையை மேம்படுத்தவும் குழு வலியுறுத்தியுள்ளது.
சாலைப் பாதுகாப்புத் தரநிலைகளைப் பேணியபடி, மாற்றுத்திறனாளிகளின் போக்குவரத்து உரிமைகளை உறுதிப்படுத்தும் வகையில் இந்த மாற்றங்களை முன்னெடுக்க குழு கவனம் செலுத்தியுள்ளது.
