முன்னாள் ஜனாதிபதி கோட்டாபய ராஜபக்ஷவின் தனிப்பட்ட செயலாளராகப் பணியாற்றிய சுகீஷ்வர பண்டார் தொடர்பான நிதி முறைகேடு விசாரணையில், அவரது வங்கிக் கணக்கில் இடம்பெற்றதாகக் கூறப்படும் பணப் பரிமாற்றங்கள் தொடர்பில் நீதிமன்றத்தில் புதிய தகவல்கள் முன்வைக்கப்பட்டுள்ளன.
குறிப்பாக, முன்னாள் ஜனாதிபதியின் தனிப்பட்ட செயலாளர் பதவிக்காக ஒதுக்கப்பட்டதாகக் கூறப்படும் சம்பளப் பணம், கோட்டாபய ராஜபக்ஷவின் சகோதரிகளில் ஒருவரின் மகனின் வங்கிக் கணக்கில் வைப்பிலிடப்பட்டதாக விசாரணைகளில் தெரியவந்துள்ளதாக மத்திய புலனாய்வுப் பிரிவு கோட்டை நீதவான் நீதிமன்றத்தில் தெரிவித்துள்ளது.
மேலும், குறித்த வங்கிக் கணக்கில் நான்கு சந்தர்ப்பங்களில் தலா ரூ.5 மில்லியன் உள்ளிட்ட, 79 தனித்தனி சந்தர்ப்பங்களில் ரூ.11.4 மில்லியனுக்கும் அதிகமான தொகை வைப்பிலிடப்பட்டதாகவும் நீதிமன்றத்தில் தெரிவிக்கப்பட்டுள்ளது.
முன்னாள் ஜனாதிபதி கோட்டாபய ராஜபக்ஷ மற்றும் குறித்த வங்கிக் கணக்கு உரிமையாளர் ஆகியோரிடமிருந்து வாக்குமூலங்கள் பதிவு செய்யப்பட்டுள்ளதாகவும் விசாரணை அதிகாரிகள் குறிப்பிட்டுள்ளனர். இந்தப் பணப் பரிமாற்றங்கள் தொடர்பான மேலதிக விசாரணைகள் தொடர்ந்து இடம்பெற்று வருவதாகவும் தெரிவிக்கப்பட்டுள்ளது.
சுகீஷ்வர பண்டார் மீது ரூ.220 மில்லியனுக்கும் அதிகமான தொகையை குற்றவியல் ரீதியில் தவறாகப் பயன்படுத்தியதாகவும் நம்பிக்கையை மீறியதாகவும் குற்றச்சாட்டுகள் முன்வைக்கப்பட்டுள்ள நிலையில், அவர் தொடர்பான பிணை மனுவை நீதிமன்றம் நிராகரித்துள்ளதாகவும் தெரிவிக்கப்பட்டுள்ளது.
