முன்னாள் ஜனாதிபதி ரணில் விக்ரமசிங்கவின் பாதுகாப்பு அதிகாரி மீது இடம்பெற்றதாகக் கூறப்படும் தாக்குதல் சம்பவம் தொடர்பில் கைது செய்யப்பட்ட தனியார் ஊடக நிறுவனமொன்றின் ஒளிப்பதிவாளர் பொலிஸ் பிணையில் விடுவிக்கப்பட்டுள்ளார்.
கொழும்பு – கொம்பனித்தெரு பொலிஸாரால் குறித்த ஒளிப்பதிவாளர் கைது செய்யப்பட்டிருந்த நிலையில், அவரிடம் சம்பவம் தொடர்பான மேலதிக விசாரணைகள் முன்னெடுக்கப்பட்டுள்ளதாக பொலிஸ் தரப்புத் தகவல்கள் தெரிவிக்கின்றன.
நேற்று (30) கோட்டை நீதவான் நீதிமன்றத்தில் நடைபெற்ற வழக்கு விசாரணைகளின் பின்னர் முன்னாள் ஜனாதிபதி ரணில் விக்ரமசிங்க நீதிமன்ற வளாகத்திலிருந்து வெளியேறியபோது, அங்கு பணியில் ஈடுபட்டிருந்த தனியார் ஊடக நிறுவனமொன்றின் ஒளிப்பதிவாளருக்கும் முன்னாள் ஜனாதிபதியின் பாதுகாப்பு அதிகாரிக்கும் இடையில் ஏற்பட்ட சம்பவத்தின்போதே இந்தத் தாக்குதல் இடம்பெற்றதாகத் தெரிவிக்கப்படுகிறது.
சம்பவத்தில் காயமடைந்த பாதுகாப்பு அதிகாரி மேலதிக சிகிச்சைகளுக்காக வைத்தியசாலையில் அனுமதிக்கப்பட்டுள்ளார்.
இதனையடுத்து சம்பவம் தொடர்பில் விசாரணைகளை முன்னெடுத்த கொம்பனித்தெரு பொலிஸார், குறித்த ஒளிப்பதிவாளரை பொலிஸ் நிலையத்திற்கு அழைத்து விசாரணை நடத்தியதுடன், பின்னர் அவரைக் கைது செய்துள்ளனர்.
இந்நிலையில், சம்பவம் தொடர்பில் சுயாதீனமானதும் சுதந்திரமானதுமான விசாரணை முன்னெடுக்கப்பட வேண்டும் என ஐக்கிய தேசியக் கட்சி கோரிக்கை விடுத்துள்ளது.
இது தொடர்பில் இன்று (01) இடம்பெற்ற ஊடகவியலாளர் சந்திப்பில் கருத்து தெரிவித்த ஐக்கிய தேசியக் கட்சியின் பிரதிநிதிகள், சம்பவத்தின் முழுமையான பின்னணி மற்றும் அதற்கான காரணங்கள் குறித்து உரிய முறையில் விசாரணை நடத்தப்பட வேண்டுமென வலியுறுத்தியுள்ளனர்.
சம்பவம் தொடர்பான மேலதிக விசாரணைகளை கொம்பனித்தெரு பொலிஸார் தொடர்ந்து முன்னெடுத்து வருகின்றனர்.
